Leef Drakinne en Drake,

Jeetje, waat geit de tied sjnel. ‘t Is alweer 4 waeke geleje det ich ‘t ieërste daagbook sjreef en ouch al twieë-en-’ne halve maondj naodet vors Mark aan de deur sjting!


Mer ich en miene adjudant höbbe zeker neet sjtilgezaete. Veur höbbe, same mit de aanhang, ‘n paar zeer geheime biejeinkómste gehad óm alles geregeld te kriege. En d’r waas (en is) nog ‘ne hieële houp te regele!

Beveurbeeld: ‘ne sjpreuk. Jao…’ne sjpreuk. Pfff, det waas nag neet zoeë gemekkelik. Mer oeteindelik höbbe veur d’r eine gevónje. Eine dae mich op ‘t lieëf gesjreve is en ich dink det geur ‘m ouch gaot omerme. Verder moste d’r nette zjwarte sjoon kómme (die draag ich normaal neet). Want “die motte good ingeloupe waere” (tip van de vors). “Angers höbse dao allein mer las van tiedes ‘t hosse en sjpringe.” De sjoon zin d’r en ingeloupe zin ze ouch al. Of ze lekker zitte? Ech waal!!!

Zeker zoeë sjpannend waas ‘t passe van ‘t pak. Sjteit ós det waal? Loupe veur neet veur gek? Mer waat ‘n topservice bie de sjnieëder in ‘t Noorde van Limburg. En veur zoge d’r oet óm door ‘n ringske te haole (al zègk ich ‘t zellef). Hie en dao mot waal nog get aangepas waere, mer ‘t ieërste resultaat moch d’r al zin. Hieël binnekort gaon veur veur de oeteindelikke passessie en den krieg ich ouch veur de ieërste kieër miene hagelnieje prinsesjteek op en de mantjel óm. Ich kèn neet wachte óm ‘t eindresultaat te zeen.

Ich merk trouwes nog weinig van ‘t gesjteuk in ‘t dörp. Mer d’r is ouch nog gèn lieës, dus d’r vèlt nog weinig te sjteuke. Zal det angers waere as de lieës einmaol oet is? Missjien dinke de miense waal gaar neet aan ós. Veur gaon ‘t mitmake.

Waat höbbe veur verder nog allemaol in gang gezatte? Nou, eigelik te väöl óm op te numme. Laot uch mer verrasse. Mer as alles löp zoeëas veur ‘t höbbe oetgedach den waert ‘t same mit uch ‘ne topvastelaovend.

Mer zin veur d’r al? Nae, huuër. D’r mot nog van alles geregeld waere, zoeëas ‘t make van ‘n foto beveurbeeld, opsjtèlle van ‘n gastelieës veur de receptie etc etc. Drök? Zeker, mer laot ós mer gewaere, veur regele det waal. En waat ich zeker neet onvermeld wil laote is det veur topóngersjteuning kriege van de PrinsKeuzeCommissie! Det moog ouch waal ‘ns gezag waere.

Mieër laes geur in mien volgend daagbook. Veur winse uch fijne fieësdaag, mer veur kieke zeer zeker oet nao die anger fieësdaag die ós in fibberwari en mieërt te wachte sjtaon.

Drakeprins 2025