’t Waas ‘ne maondigaovend, róndj de klok van half ellef, in de twieëde hellef van september. Ich waas dae aovend allein thoeës en ligk oppe bank ein of anger wazige film te kieke wie de deurbel ging. Ich sjleep half en dach nag: “Is det noe oppe tillevisie of sjteit der ech emes aan de deur? Ich zal ’t waal gedruimp höbbe”.

Nag gèn minuut later, de telefoon! Waem belt nag zoeë laat? Ich kiek en krieg ’n hertverzakking: Mark Selen! Ich pak op en huuër de wäörd: “Bösse thoes? Kènse aope make? Ich sjtaon veur de deur.“

Nou, ich kèn uch neet besjrieve welke emoties d’r allemaol door mich haer ginge op det moment. Want ich veulde ’t toen natuurlik al aankómme. ’n Bietje sjlaopdrónke loup ich nao de veurdeur en jaowaal huuër, dao sjteit d’r, vors Mark. Hae waas nag neet good en waal binne, wie d’r mich de vraog sjtelde: “Wils doe in 2025 prins van alle Drake en Drakinne waere?!”

Zónger ouch mer ’n milliseconde nao te hove dinke, zègk ich: “JAO, natuurlijk wil ich det!”

Ich mot uch ieërlik bekènne det de res van de aovend ’n bietje as ‘ne waas in mien gedachte is blieve hange, D’r kwame doezjend-en-ein vraoge bie mich op. De vors zoog det natuurlik aan mich en sjtèlde mich gerös: “Wèn d’r mer ieërs ‘ns aan, die vraoge waere later allemaol beantjwaord. Veural röstig blieve.” (Det höbbe v’r dökker gehuuërd).

Ohh, noe mot ich ouch nag ’n keuze make veur ‘ne adjudant. Nao d’r same euver naogedach te höbbe, waas die keuze oeteindelijk sjnel gemaak. “Mer noe mot ich ‘m nag vraoge… en waat as hae ‘nae’ zaet? Det zooj ‘ne bak zin!” Ich höb ’n good moment oetgezòch óm ‘m ‘face to face’ te kènne vraoge (det waas neet èns zoeë gemekkelik). Godzijdank waas hae net zoeë enthoesias es ich. Pfff, d’r veel ‘ne hieële groeëte las van mien sjouwers. Noe kèn ’t pas ech beginne!

Mer good, veur zien inmiddels angerhalve maondj verder en ich mot zègke, ich bön al hieëlemaol aan ’t idee gewènd. Ich kèn al bienao neet mieër wachte toet ós moment van oetkómme. En miene adjudant is al minstes zoeë enthoesias.

Hiel väöl vraoge die ich haaj, zien inmiddels beantjwaord tiedes de ieërste MEGA geheime biejeinkóms mit de prinskeuzekemmissie in ’n kefee hiej neet wieëd vanaaf. Mich is dudelik det d’r mich en miene adjudant nag hieél väöl te wachte en ouch te doon sjteit veurdet veur oetkómme op 1 fibberwari. Dao euver laes geur de volgende kieër mieër!

Drakeprins 2025