As ‘ne dondersjlaag bie heldere hieëmel bereikde ós gistermorge ’t versjrikkelikke berich det Rob Rutten, kastelein van de Troubadour op 54-jäörige laeftied is euverleje. ’t Leek asof de waereld de handjrem d’r op haaj gezatte. ’t Werk waerde d’r bie neergelag, planne van de daag waerde oet de agenda gevaeg. Beesel sjting sjtil.

Rob… waat flikse ós noe toch!? Veur verleze hiemit ’ne aad-prins, ieëredraak, ‘ne kastelein… mer nag väöl mier den det! Det de Drakevlag oppe Aaj Mert half-sjtok hink, zaet genóg. Dit raak ós allemaol… Idderein dae get organiseerde in Beesel haet altied kènne bouwe op Rob. Hae sjting altied klaor en nieks waas te gek. 

’t Gemis is den ouch eigelik mit gèn pen te besjrieve en al dees wäörd doon nóg te kort aan det waat Rob veur ós, veur Beesel, veur de Troubadour en natuurlik veur Christel en de kinjer beteikende. ‘ne Man mit karakter… of nae… hae waas ’t karakter! Hae kós sjteuke, lache, knotere en mit ós mitdinke. Hae heel vas aan sjoeën tradities en kós ouch sjtilletjes euveral van geniete dao achter die bar! 

Mer Rob… doe vónjs ’t versjrikkelik as veur dich in de spotlight zatte, want den zoog ouch idderein desse mer ’n klein hertje haajs! Mer mit det kleine hertje waas doe waal ’t kloppend hert van ós dörpke Beesel. En det motte veur noe misse, det zien veur kwiet… de Troubie zal noeëts mier ’t zelfde zien… Beesel zal noeëts mier ’t zelfde zien.

Bèste Drake en Drakinne en idderein dae dit leus: as geur morge aan ’t körsdiner zit… dink den estebleef efkes aan Rob. Aan Christel en de kinjer en aan idderein óm uch haer dae uch leef is! En, zoeë wie Spik & Span ’n paar jaor truuk zónge: vier ’t laeve! Want det is wie Rob ’t gaer zooj wille.

Veur gaon dich misse Rutten!

Names ós ganse vereiniging wènse veur Christel, Max, Jill, team Troubie én idderein dae Rob in zien hert haet hiel väöl sjterkte de kómmende tied.