Tiedes de Nach van de Prins op zaoterdig 13 jannewari is Patrick Aspers oetgerope as prins Patrick I van CV de Drake in Beesel. Same mit zien broor Marcel as adjudant gaon zie de Beeselse vastelaovend veur ónger ‘t motto:
De sjpreuk sjleit op häör allebei: prins Patrick (47) is al ruum vieftieën jaor cirremoniemeister van CV de Drake, waobie d’r altied mit ziene cirremoniemeistersjtek veurop geit. Adjudant Marcel (51) sjleit al mier as 3×11 jaor de klein tróm bie De Drakekapel. Daonaeve is dit duo al hiel get jaore actief in ’t Beeselse vastelaovesgebeure. Prins Patrick I is al sinds 2004 bie de raod van 11, wao d’r jaorelank de hoeësfotograaf waas van CV de Drake. Mer ouch al veurdet hae bie de vereiniging kwaam, waas hae al as vriewilliger creatief betrókke bie de Beeselse vastelaovend as decorsjiljer veur de Bóntje Revue en illustrator, en later vormgaever, van vastelaovesgezet De Draaksjtaeker. Adjudant Marcel is behalve lid van de Drakekapel, al sinds 2011 veurzitter van CV de Drake en actief in diverse commissies.
Creatief
Prins Patrick I woeënt aan de Wittebergsjtraot, same mit zien vrouw Karin en zien twieë zeuns Lars (14) en Sem (bienao 12). In ’t dageliks laeve is hae grafisch vormgaever bie Aviso oppe Ruiver. In de vrieje tied dae hae naeve alle take veur de vastelaovesvereiniging nog euver haet, waert d’r regelmaotig ingesjakeld óm foto’s te make. Zoeë is d’r ouch al drie edities de vaste fotograaf van ’t Draakstjaeke en maak d’r deil oet van de organisatie van de dörpsquiz BeeselMania. Patrick geit d’r gaer op oet mit zien gezin; waobie mit name de vakanties ouch altied gedetailleerd oppe geveulige plaat waere vasgelag.
Veurzitter
Adjudant Marcel woeënt same mit zien vrouw Maud en twieë dochters Bibi (14) en Nova (11) aan de Baoveste Solbergwaeg. Hae wèrk as inkouper bie woeëningcorporatie Antares in Tegele (wao Patrick zien vrouw Karin ouch wèrk as communicatieadviseur). Ziene vrieje tied geit veur ’n groeët deil zitte in ’t werk veur de vastelaovesvereiniging, want det geit ’t ganse jaor door. Daonaeve óngernump ouch hae gaer leuke dinger mit zien gezin en vinjt d’r ’t leuk óm te borrele mit vrunj.
Jóngesdruim
Prins Patrick en adjudant Marcel kènne neet wachte óm zich in alle vastelaovesactiviteite te sjtorte! Want prins zin is veur Patrick toch waal ‘ne jóngesdruim dae oetkump. Hae waert al ’n jaor of twintig mit get tössepoze as meugelikke prins geneump. Dit jaor geit ’t den ech gebeure!
De receptie van prins Patrick I en adjudant Marcel is op zaoterdig 10 fibberwari vanaaf 20.30 oer bie Hoeve de Bongerd in Beesel. Mit optraejes van La Bamba en Hoondervel!
