BEESEL – Zónjig 14 jannewari 2024 is Bibi Aspers tiedes ’t JeugDrakeSjpektakel oetgerope as jeugprinses Bibi I. Same mit adjudant Jans (Fransen) gaon ze de Beeselse jeug veur ónger häör motto:

Prinses Bibi I kump oet ’n ech vastelaovesgezin det besjteit oet pap Marcel, mam Maud en zuske Nova. Adjudant Jans is de dochter van Nicole en aadprins Rick III en de zus van aad-jeugprins Teun I. ’t Vastelaovesblood zit dus bie allebei in de femilie; en ze zin ouch nog ‘ns femilie van elkaar: Jans is namelik ’t achternichje van Bibi! Det beteikent det ’t ganse prinselik gezelsjap in Beesel dit jaor femilie is: pap Marcel is namelik adjudant van prins Patrick I, dae ónnog de paetome van Bibi is!

Bibi I en Jans zin allebei 14 jaor, zitte allebei in de derde oppe Broekhin én wèrke allebei in de keuke: Bibi bie de Troubadour en Jans bie De Mert in Zjwame. In häöre vrieje tied zien ze same op ’t voetbalveldj te vinje of zin ze lekker same aan ’t shoppe of anger leuke dinger aan ’t doon mit vrunj en vriendinne.

Prinses Bibi en adjudant Jans verheuge zich op alle vastelaovesactiviteite, wao ze same mit häöre jeugraod én prins Patrick en adjudant Marcel veurop gaon. Same gaon zie d’r ’n ónvergaetelik fieës van make!

De receptie van jeugprinses Bibi I vinjt plaats op zónjig 4 fibberwari vanaaf 14.11 oer in aetkefee de Troubadour. De jeug wilt d’r gaer ’n fieësje van make, dus leefs neet te väöl toesjprake, mer lekker same gaas gaeve!