Veur de körsdaag veel opèns ‘ne flyer van de CV de Drake in de brevebös mit dao-in ‘t vastelaovesprogramma! Dao sjteit ’t den… zjwart op wit… alle activiteite wao veur dalik bie veurop gaon! Waat trouwes waal ‘n sjoeën detail is… ich bön dalik prins van de Drake… in ‘t jaor van de Draak! Wie sjiek is det? Mot eigelik ‘ns opzeuke in welk jaor ich gebaore bön… zooj ‘t? 🤔

En noe… noe zien die fieësdaag alweer achter de rök. De vastelaovesmuziek sjteit weer get helder en veur zien de lètste daag, nae oere aan ‘t aaftèlle! Óngertusse is ‘t Bacchusoetrope al gewaes! Ich höb mich dae aovend mer get op de achtergróndj gehaje. D’r kómme nog genóg daag wao veur kènne knalle! 💥

Mer Ferd, ‘ne dieke proficiat names mich en miene adjudant. Sjiek desse dit viers mit dien broor en naeve. Geniet daovan! Nog ‘n paar daag en den sjloete veur aan en gaon veur d’r same zeker ’n sjoeën fieës van make! 🥳

Veur höbbe net veur dit sjrieve de lètste biejeinkóms in ‘n vaag kefeeke gehad en alles is besjpraoke. Zoeë waerde al effe vertèld det zaoterdig al drek ’n interview door omroop P&M oppe planning sjteit! Och ja, det kèn d’r nog waal bie. 🤣 Zien d’r den dalik gèn verrassinge mier? Och vas waal, mer as echte vastelaovesvierders höbbe veur waal ’n beeld van die daag. Mer ja, óm det te belaeve as prins en adjudant is toch waal effe get angers! 

‘t Is óngeluifelik wie sjnel die veer maondj, det veur de móndj móste haje, veurbie zien gegange. Zeker de aafgeloupe waeke mit die fieësdaag vloge veurbie! ‘n Paar daag vrie… thoeës al get ligke te knómmele zoeëdet v’r dao ouch get miense kènne óntvange. Den bösse lekker bezig en höbse effe gaar gènne tied óm sjtil te sjtaon bie det oetkómme. Och… laot mer kómme, dae 13e! ‘t Waert hoeëg tied det dae draak de zaal intrèk. Veur zien d’r klaor veur! 🐲

Prins… de zoeëväölste!