Zaoterdig 21 jannewari 2023 is Jeroen Luttels, tiedes de Nach van de Prins, oetgerope as prins Jeroen I van CV de Drake oet Beesel. Ze höbbe d’r door corona ’n jaor op motte wachte, mer noe moge ze ein-de-lik los! Same mit ziene bèste vrundj Stef Crompvoets as adjudant geit hae deze vastelaovend in Beesel veurop ónger zien motto:
Veurdet prins Jeroen (31) in 2018 aan de sjlaag ging as conciërge bie Gilde Opleidingen in Venlo, zoot hae ruum 9 jaor in ’t leger. Veurig jaor haet d’r in Beesel ’n hoes gekóch mit zien vriendin Inge, die net as Jeroen ‘ne échte ‘vastelaovesgeneter’ is. Nao ’n flinke verbouwing woeëne ze noe in häör prinselik palies. Sjtilzitte is neet zien dink; zoeë voetbalt Jeroen nog in ’t twieëde van Bieslo, is hae op zaoterdig te vinje oppe tennisbaan én is d’r nog lid van Jong Nederlandj. Jeroen is grote broor van Saskia en Joost en hae kiek d’r enorm nao oet det d’r binnekort veur de ieërste kieër ome waert.
Net as Jeroen is ziene adjudant Stef (37) conciërge bie Gilde Opleidingen en haet d’r jaor in deens gezaete wao hae waerde oetgezónje nao Afghanistan. Stef is opgegreuid as Hopsjlokker in Zjwame, mer ouch Stef haet de waeg nao Beesel gevónje en is getrouwd mit Michelle det d’r langzaam veur zorg det Stef ‘ne echte Beeselse Draak aan ’t waere is. Stef en Michelle verwachte lèts mieërt, begin april häör ieërste kiendje.
’t Duo is al jaore actief (en gruuëts) betrókke bie de Beesele jeugvastelaovend en ze kieke d’r nao oet óm same mit jónk en aad ’n sjoeën fieësje te bouwe. Ze verheuge zich op alle sjaele wazel en ze höbbe zich veurgenaome óm same mit partners Inge en Michelle te genete van idder moment.
De receptie van prins Jeroen I en adjudant Stef is op zaoterdig 18 fibberwari vanaaf 20.30 oer bie aetkefee de Troubadour in Beesel. Mit optraejes van Fiorenza en W-Dreej!
