Daagbook van de nieje Prins (deil 1)

’t Is zoeëwied, de prinskeuzecommissie van De Drake is d’r oet. D’r kèn begós waere mit ’n niej verhaol van waat mich betruf ’t sjiekste waat Beesel kènt. 

Zoeëmaar ‘ne aovend. Ich haaj de aafwas net weggewèrk en mich ‘ne lekkere werme chocomel gemaak en ploefde neer oppe bank. De aafsjtandsbedening nog in mien henj, en dinkend: kump d’r get oppe tillevisie vanaovend of waert ‘t ‘ne aovend Netflixe? Dao geit de bel. Hie ligk toch gèn pakketje van de bure, waas ’t ieërste waat ich dach. Want waem zooj d’r angers saoves nog aan de deur mótte kómme? Mer wie ich de deur aopemaakde waas ich verras. ’t Ware neet de bure, mer vors Mark dae aan de deur sjting. Hae vroog of d’r gelaege kwaam en of d’r effe binne móch kómme. Tuurlik Mark, kóm binne. 

Toen Mark binne waas en ich eigelik besefte waat d’r kwaam doon, dach ich: zal ’t den ech? Ich? 
Wie de vraog gesjtèld waerde, wis ich ’t antjwaord eigelik geliek. JAO! Ich wil de nieje Drakeprins waere. 

Mer d’r nao, wie alles ’n bietje gezak waas, kwame d’r bie mich al ‘ne houp vraoge op. Waem waert miene adjudant? Wie gaon ich dae vraoge? Wie zal dae reagere? Geit d’r jao zègke? Waat waert miene sjpreuk? 

Ich besjlaot hie mer ‘ns ’n nach euver te gaon sjlaope. Althans, sjlaope is neet gelök, ich höb naogedach euver alles waat d’r op mich aaf geit kómme. Vanaaf noe moog ich druime euver al die sjieke dinger die ‘ne Drakeprins moog mitmake. 

Waert vervolg…

Alaaf,
De nieje Drakeprins 2022

DeIl dit berich