Bèste drakinne en drake,
Aafgeloupe jaor höbbe veur helaas gènne vastelaovend gehad. Mer det wilt neet zègke det veur sjtil höbbe gezaete! Natuurlik höbbe veur geprobeerd óm uch toch ’n bietje ’n vastelaovesgeveul te gaeve mit die daag (al kèn det zeker neet tippe aan ’t fieës wie veur det gewènd zin), mer ouch nao de ‘vastelaovesdaag’ zin veur doorgegaon.
Want asof de coronacrisis nog neet genóg oetdaginge mit zich mitbringk, zien d’r mit de Bongerd en de Maashof twieë sjoeëne locaties weggevalle. De evenemente die veur dao haje (zoeëwie de Nach van de Prins, de Bóntje Revues en de Prinsereceptie) mótte noe örges angers haer.
Veur höbbe ’t aafgeloupe jaor versjillende meugelikhede serieus óngerzóch: geit de Bongerd éch nimmer aope, kènne veur in ‘n loeëds terech of zètte veur ‘n tent oppe Mert? Nao versjillende gesjprekke loog ózze grótste focus op ‘n tent oppe Mert. Want wie sjiek zooj det zien!
Mer ‘t financiële plaetje, én de ónzekerheid wao veur noe helaas nog sjteeds in zitte, haet ós doon besjloete óm van dit plan aaf te zeen. En naodet ’t niejs aafgeloupe waek nao boeëte kwaam euver de versjillende 11e-van-de-11e-activiteite die zien aafgelas, kènne veur allein mer concludere det dit de enige juuste besjlissing is gewaes.
Det beteikent det ós vastelaovesactiviteite zich veural gaon aafsjpele in de Troubadour. Ouch de Bóntje Revue en de Prinsereceptie! Jao, det waert passe en maete, mer dit guf ouch weer meugelikhede óm dinger angers te doon. Zoeë kump de nieje prins neet oet nao aafloup van de Bóntje Revue, mer ’n paar waeke ierder op de ‘Nach van de Prins’. ’t Waert dus éch de Nach van de Prins. En de Revue krieg waarsjienlik mier veursjtèllinge.
Verdere details make veur dao later nog waal euver bekènd. Veur gaon noe gewuuën door mit de veurbereidinge en haope veur det veur in 2022 weer éch vastelaovend kènne viere in ós Drakedörp. De artieste zien alweer geboek en veur höbbe d’r óntzettend väöl zin in!
Oh ja… nog éin dingske… dit jaor gaon v’r veur ’t ieërs wèrke mit ‘n euverkoepelend thema veur al die daag. De Nach van de Prins, Bóntje Revue, vastelaovesgezet De Draaksjtaeker én de optoch kriege allemao ’t thema – wie kèn ’t ouch angers – ‘passe en maete’!
Vastelaovend same!
