Keuninklikke Óngersjeijing Theo Geraets en Huub Geerlings

Vandaag höbbe Theo Geraets en Huub Geerlings ’n Keuninklikke Óngersjeijing óntvange oet henj van burgemeister Bob Vostermans.

In 1992 waerde Theo prins van de Drake, maar ruum daoveur waas hae al same mit Huub actief tiedes de vastelaovend as lid van ‘Trio Los Vas’. Daonaeve ware ze beide actief as sjpeler van de Bóntje aovende. Ze ginge later aan de sjlaag as tekssjriever en lid van de regiecommissie, waat ze toet op de daag van vandaag gehiel belangeloos en vol passie doon.

Bie de CV waas Theo ónger angere kertrekker van de adjudantecommissie en actief in de prinskeuzecommissie. Theo is nog sjtieës de groeëte kertrekker van de regiecommissie van de Bóntje Revue. Bie Bieslo, wao hae al sinds 1972 lid is, is Theo toet 2018 teamleider gewaes van versjillende jeug- en seniorteams. Hae is ’n gewaardeerd lid, wao nog altied ’n beroep op kèn waere gedaon veur de begeleiding van teams of ’t prizzentere van activiteite en fieësaovende!

En bie ’t Draaksjtaeke is Theo ouch neet mier weg te dinke. In de jaore ’70 deej hae al mit as acteur, maar waerde later, same mit Huub, tekssjriever en regisseur.

Huub waerde in 1986 prins en waas later cirremoniemeister en natuurlik vors van CV de Drake (2004 toet en mit 2011). Hae is ein van de groeëte animators achter de zanggroep en oprichter van de ‘club van 50’, ’n prachtige erfenis veur de Beeselse vastelaovend.

Maar ouch bie Bieslo, wao Huub al sinds 1972 lid is, sjtik hae de henj oet de moewe. Zoeë kènne de meiste ‘m as trainer van de jeug, mer Huub is ouch altied betrokke bie de organisatie van de jeugtoernoje en waas hae veurzitter van ’t 100-jäörig jubileum. En ouch Huub waas al as klein menke actief as sjpeler bie ’t Draaksjtaeke. En later dus same mit Theo as tekssjriever en regisseur.

Theo en Huub gaon, mit de regie van ’t Draaksjtaeke in ’t veuroetzich, de regie van de Bóntje Revue noe langzaam euverdrage op de jóngere generatie. 

Vanaaf dees plaats wille veur Theo en Huub bedanke veur alle inzèt en van herte felicitere mit dees biezónjere óngersjeijing!

DeIl dit berich

Share on facebook
Share on google
Share on twitter
Share on linkedin
Share on pinterest
Share on print
Share on email