Lèts mieërt krege veur in ózze digitale brevebös ‘ne mail. ’t Waas ’n berich van Philip Stollman, zoon van wijle Martin Stollman. Martin waas lid van trio De Globetrotters oet Haerle, die in de jaore ’70, veural in de vastelaovestied, erg populair ware!
In deze tied traoje ze ouch op tiedes de zitting in Beesel. As dank krege ze in 1970, oet henj van Drakeprins Piet I (van Herten), ’n beeld oetgereik: de 4 muzen.
Martin is helaas in 1977 euverleje, mer ’t beeld is altied in bezit gebleve van de femilie. Moder laef gelökkig nag, mer haet jaomer genóg gèn plaats meer veur ’t beeld. Daoróm höbbe ze contac mit ós gezóch óm te kieke of veur det gaer truuk wille.
Op de foto waas al drek dudelik det dit ’n beeld waas oet ’t atelier van St. Joris en sjting veur ós vas: dit beeld huuërt thoes bie Stichting Beesels Keramisch Erfgoed (SBKE). Veurzitter Rob Dijcks reageerde gelökkig net zoeë enthousias as ós!
Nao ’n aantal leuke, enthousiaste mails mit Philip kwaam d’r nog ’n verrassing! ’n Beeld van St. Joris en de Draak. Ouch dit beeld haje ze van de vastelaovesvereiging óntvange en moge veur ouch truuk höbbe! Dees waek is Rob, dae in Sittard wèrk, aafgereis nao Gelaen om dao bie mevrouw Stollman-Dupont de beelde in óntvangs te numme.
Veur zin d’r gruuëts op det dees beelde nao 50 jaor truukkómme nao Beesel! 💙💛
Foto: Stichting Beeselse Keramisch Erfgoed
