Bèste Drake en Drakinne, 

Ich bedink mich: wie mot ich zo’n daagbook sjrieve in godsnaam beginne? Ich zal ‘ns bie ‘t begin beginne. ‘t Waas ‘ne werme (missjien waal wermste) zomeraovend wie ich in eine kier oug in oug sjting mit vors Mark. Veurdet de vors de vraog sjtèlde, dach ich nog efkes: ‘t zal toch neet zoeë zien?! Mer toen kwaam die vraog… wils doe kómmend jaor de scepter zjweije euver alle Drakinne en Drake?

Ich weit neet of de vors miene twiefel verwach haaj? Mer mien antjwaord waas metein: ‘Dao mot ich ‘ns ieërs euver naodinke.’ Vors Mark zag geliek det ich waal effe de tied kreeg óm te dinke. Hieël fijn! Diezelfde nach höb ich óntzettend ónröstig gesjlaope, want ich wis ech neet zoeë good wie ich ’t haaj! Allemaol scenario’s ginge mich door de kop. Mer ich realiseerde mich ouch det ich dees kans waarsjienlik mer eine kieër in mien laeve zooj kriege. 

’n Paar daag later höb ich contac gehad mit vors Mark, want ich haaj hiel väöl vraoge. Veur besjlaote mit de ganse prinskeuzecommissie (PKC) same te gaon zitte. ’n Paar daag later zote v’r veur ’t ieërs same óm taofel. Ich kreeg ’n adres doorgesjtuurd en kwaam oet bie ’n aad broen kefeeke, örges ’n paar dörpkes verderop. Alle vraoge die ich mich bedach haaj, waerde beantjwaord en eigelik veur ’t ieërs waerde ich neet misselik van ’t idee. Eigelik wis ich vanaaf moment ein det ich dit ech hieël gaer wooj en missjien haaj ich ’t juus noe waal gaar neet verwach… Nao óngevier twieë waeke twiefele durfde ich de PKC den ouch mien jao-waord te gaeve! 

Ich ging aan de sjlaag mit mien hoeëswerk en dus höb ich ouch miene biesjtandj geregeld. Veur höbbe al mierdere aovende in ’t geheim biejein gezaete óm te bedinke wie veur ’t gaer wille gaon doon. Zoeëwaal mit as zónger de PKC. Ich kèn uch vertèlle: det zien aovende mit väöl gezelligheid! Mer allein mit gezelligheid kómme veur d’r neet dit jaor in de veurbereiding oppe vastelaovend, want d’r mót ‘ne hieële houp geregeld waere. 

Zoeëas ouch ’t passe van ’t pak. ’n Speciaal moment veur ós. Veur zien namelik neet ech gewènd óm mit ’n pantalon, ’n sjtrikske en laksjoon veur de sjpegel te sjtaon. Mer ’t veulde waal sjiek en hieël biezónjer. 

Och jao, en den ouch nog ’n ludiek sjpel mit versjillende groepe oet Beesel die moge raoje veur ‘ne sjieke pries waem dit jaor de nieje Drakeprins waert. Ich waer ‘t, kèn ich uch verzekere! En jao, ich sjtaon ouch oppe lieës van de ellef kandidate die zien gepresenteerd op 13 september. Dus gank veural door mit raoje, want allein den maak geur kans op dae sjieke pries. 

D’r is vanalles geregeld, mer d’r mót ouch nog väöl geregeld waere veur ’t zoeëwied is. Mer veur kieke langzaam mit hieël väöl zin oet nao 17 jannewari as geur ós oppe bühne ónger dae draak oet zeet kómme. Geur zalt sjnel mieër van mich huuëre! 

Drakeprins 2026