Hae sjting al jaore oppe lieës, mer dit jaor moog d’r ouch ech as veurgenger veurop gaon tiedes de Beeselse vastelaovend: Largo I (de Vlieger) is oetgerope as Drakeprins 2025! Ziene adjudant is ouch zeker gènne ónbekènde: die rol is veur aad-prins Roy (Smeets).

Veurig jaor dach Largo nog: ich sjtaon al jaore op die lieës, van mich hoof ’t eigelik nimmer zoeë, laot de jóngere mer veurop gaon. Waat mótte ze nog mit ‘ne 50-plusser? Mer wie vors Mark in september veur de deur sjting, twiefelde d’r gèn seconde en zag vol euvertuging: JAO! Prins Largo is 53 en gebaore en getaoge in Beesel. As ‘boerejóng’ op ’t mèlkvieëbedrief van zien eljers, mer ’n laeve as boer zoog d’r neet zitte. Nao zien sjoeël en sjtudie kwaam Largo bie de Rabobank terech, wao d’r door de jaore haer hiel get versjillende functies en locaties haet gehad. Noe is d’r in deens bie Totality in Ravenstein, ’n detacheringsbureau veur de financiële deensverlening. Via dit bureau is d’r ouch weer bie de Rabobank aan de sjlaag, dit kier in Hengelo.
In ziene vrieje tied drink Largo gaer ’n pötje beer mit vrunj, probeert d’r drie toet veer kieër per waek de sjportsjoeël te bezeuke veur krachtraining en zaet d’r gèn ‘nae’ taege ’n goej film of serie op Netflix. Verder haet d’r same mit aad-bandleje van coverband ‘5,6 promille’ de draod weer opgepak óm same meziek te make veur ’n einmaolig reünieconcert örges twieëde hèllef van dit jaor. Laot uch verrasse…
Same mit adjudant Roy is Largo ouch nog lid van de sjötterie, wao ze allebei in ’t besjtuur zitte. Roy wèrk al ruum 30 jaor in de zorg waovan de aafgeloupe 11 jaor as business consultant bie Assist, ’n bedrief det zich rich op innovatie in de extramurale zorg. Roy is net as Largo ‘ne muzikant in hert en nere. Door häöre muzikale achtergróndj höbbe ze väöl raakvlakke. En ouch same ’n vastelaovesnummer opgenaome: Wolkeplaats!
Ze zien d’r van euvertuug det ze d’r same ’n fantastisch vastelaovesseizoeën van gaon make, ónger häör motto:

De receptie van prins Largo I en adjudant Roy is op zaoterdig 1 mieërt vanaaf 20.30 oer bie Hoeve de Bongerd in Beesel. Mit optraejes van W-Dreej en Pruuf Mar!