De kop is d’r aaf… en veur zien los! Eindelik hove veur nimmer te zjwiege. Want det waerde waal sjtieëds lastiger wie d’r ouch sjtieëds mier gesjteuk waerde. Veur höbbe ech genaote van det gesjtechel en veur deje d’r zelf net zo hel aan mit! Det is ouch precies de raeje waoróm veur ouch ech ’n paar serieuze hints höbbe versjtop in ós daagbeuk! Beniejd welke? Dao gaon v’r…

Daagbook deil 1

De oplèttende laezer haaj kènne zeen det idder daagbook begint én eindigt mit ’t waord ‘veur’. De ieërste ‘veur’ wao idder daagbook mit äöpent, sjteit veur de cirremoniemeister dae natuurlik veurop löp. De aafsjloetende ‘veur’ is van de veurzitter dae natuurlik alles euverzuut! 🧐

Geur haajt ouch kènne weite det d’r aardig get hints versjtop zoje zitte in dees daagbeuk. Veur zagte al euver det daagbook ‘Ech, mot det? Det is 9 van de 10 kieër toch ‘t zelfde….?’ Nou, deze keer dus neet. 

Derde alinea, wie Mark mich belde ‘Ich weit neet wie ’t bie uch is, mer ich bön den neet bezig mit prinskandidate!’. Klop hielemaol. Neet mit prinskandidate, maar waal drök mit al die anger dinger veur de vastelaovend!

Mer alle gekheid op ‘n sjtekske… Tja, dao sjteit d’r den! Ózze sjpreuk! Waal leuk óm te vertèlle… op det moment haje veur eigelik ‘ne angere sjpreuk in gedachte. Dae sjloog mier op ’t ‘dao gaon v’r veur’. Maar naodet deze gepubliceerd waas, zag ich taege Marcel: ‘vólges mich sjteit ózze sjpreuk al in ’t ieërste daagbook’. 🥳

Daagbook deil 2

In de ieërste alinea ‘Zo’ne sjpreuk mót natuurlik waal örges op sjlaon’. ‘ne Moeie hint nao de klein tróm van adjudant Marcel! 🥁

Derde alinea: ‘Ich höb ‘t toch aan emes vertèld  waem ich erg leef höb.’ Ja, det is natuurlik mien paetekindj Bibi. ’n Jeugprinses kèn ouch hieël good zo’n ‘groeët geheim’ beware! Veur haje ós veurgenaome óm ’t eigelik nemes te vertèlle. Ouch ós kinjer neet, die huuërde det pas op de zaoterdig van ’t oetkómme. Mer Bibi mós örges in oktoeëber veurig jaor zien geheim mit ós deile. Geweldig waat ware veur enthousisas en blie! Naodet Bibi weer effe nao boeëte waas joetse mit Nova, Lars en Sem zag ich taege Karin, Marcel en Maud det ich ’t ouch wooj deile mit Bibi. Dus Bibi ge-app en truuk laote kómme. Dao kwaam ’t haer… vónj ’t mer raar det veur ‘m truuk repe. En toen vroog ich ‘m ‘kènse ouch twieë of drie geheime beware? Ich waer prins en diene pap waert adjudant!’ Neet te besjrieve wie sjiek det moment waas! Waanzinnig… 🥰

En door nao de 11e van de 11e. Nae, veur zien neet nao Remunj of Venlo gewaes. Det sjteit dao ouch neet. Mer veur vierde waal de verjäördig van Karin en de vastelaovesmuziek sjting kei-hel aan. De kinjer ginge op ’n gegaeve moment nao baove en kwame gesjmink truuk. Dao sjtinge ze den, die gesjminkte sjnoete tusse ós. Gèn idee nog van det waat kómme geit.🥸

De viefde alinea ‘En den rap 2023 oet roetsje. Kèn neet wachte op volgend jaor!’. Dae lètste zin is ’n get aangepasde teks van de lètste zin oet ’t refrein van ’t Vastelaovendjlidje van Preens Phil 1 oet Wieërt. En veur diegene die wieër gaon zeuke… wie hèt Preens Phil mit ziene achternaam? Jazeker! 🤯

Lètste alinea: ‘Gelökkig vèlt ‘t kommentaar op sjtraot mich hiel erg mit en zit mer ‘ne inkeling op mich! En as emes d’r nao vreug, mósse efkes mit ‘n sjtaole gezich ‘n klein leugentje vertèlle.’. Ja, det kleine leugentje höb ich dao nét vertèld. Want ich waerde juus duchtig geneump. NEET TE DOON!🤥

Daagbook deil 3

Phaoo… dao waerde ’t mich toch langzaam get heit ónger de veut. Dus hie móste veur ós waal ’n bietje inhaje. Mer toch!

‘Veur de körsdaag veel opèns ‘ne flyer van de CV de Drake in de brevebös mit dao-in ‘t vastelaovesprogramma!’. Dae flyer, wao ich zelf de vormgaeving van doon, dae flyer dae ich zelf maak. 😜

‘Ich bön dalik prins van de Drake… in ‘t jaor van de Draak! Wie sjiek is det? Mot eigelik ‘ns opzeuke in welk jaor ich gebaore bön… zooj ‘t?’ Jao det zooj! Gebaore in 1976, ’t jaor van de Draak en ouch nog op St. Jorisdaag. Hie waerde toch waal ’n paar miense wakker. Hè Daisy!? Mer ja, ’n paar oer later zoot ’t weer op Jeroen! 🐉

Twieëde en derde alinea: ‘Ich höb mich dae aovend mer get op de achtergróndj gehaje.’. Klop hielemaol. Waas waal dao, maar sjting fijn mit de raod in ’n heukske! ‘Mer Ferd, ‘ne dieke proficiat names mich en miene adjudant. Sjiek desse dit viers mit dien broor en naeve. Geniet daovan!’ Ja, ich haaj eigelik wille sjrieuwe ‘DET ZIT BIE ÓS IN DE FEMILIE!’ mer det ging natuurlik neet. Hie höb ich dit waal effe extra beneump, ómdet ich ’t natuurlik ouch ging viere mit mien broor, paetekindj en achternichje! 🤫

Veerde alinea: ‘Zoeë waerde al effe vertèld det zaoterdig al drek ’n interview door omroop P&M oppe planning sjteit!’. Omroop P&M… P&M… vélt d’r al? Patrick & Marcel?😉

‘Zien d’r den dalik gèn verrassinge mier? Och vas waal, mer as echte vastelaovesvierders höbbe veur waal ’n beeld van die daag. Mer ja, óm det te belaeve as prins en adjudant is toch waal effe get angers!’. Tja, det vastelaovesprogramma, dao hove ze ós nieks euver wies te make. Jao, det kènne veur waal druime! 😁

‘Waert hoeëg tied det dae draak de zaal intrèk. Veur zien d’r klaor veur!’. Hie zègke veur hiel bewus neet ‘hoeëg tied óm ónger dae draak te gaon’. Oeteraard ‘n kleine hint nao ós plan óm haopelik nog get miense op ’t lètste moment op ’t verkierde bein te zètte. Gewuuën zoeë wie altied veur de draak oet en neet ónger dae draak zoeë wie ’n prins det in Beesel normaal belaef!’. 🐲

Det waas ’t waal zo’n bietje. Oeteraard mósse altied oplètte desse neet te väöl weggufs. Mer al mit al höbbe veur ós bès gedaon óm ’t sjpel te sjpele. Sjiek óm det zoeë te kènne doon!

Veur make ós op veur ’n geweldig sezoeën en gaon d’r ‘ne sjieke tied van make ónger ós motto:
‘Alle gekheid op ’n sjtekske’. Hae sting d’r gewuuën, hè…

Drakeprins Patrick I & adjudant Marcel