Vandaag is ’t Bartje postuum oetgereik aan Frank Knols †, dae ’t aafgeloupe jaor helaas plotseling is euverleje. Frank waas enorm betrókke bie de Beeselse vastelaovend en de jeugcarnaval in ’t biezónjer.

Frank waas de groeëte animator achter ’t Drakesjpektakel det d’r jaorelang organiseerde. En waat waas d’r gruuëts wie ziene zoon in 2015 waerde oetgerope toet jeugprins Budi I. Alles waerde oet de kas gehaold óm d’r ’n groeët fieës van te make, waobie idderein altied welkóm waas.

Neet allein op organisatorisch vlak waas Frank actief. Idderein herinnert zich ouch vas de jaorlikse optóch wao d’r altied aan mitdeej mit ’n origineel idee. Frank waas ‘ne super vereiniginsmiens, mer baovenal ‘ne echte femiliemiens. Daoróm haet ’t bestjuur van CV De Drake ’t Bartje, verneumd nao Bart Evers dae as lid van de jeugraod in 2006 is euverleje, vanmorge oetgereik aan de femilie Knols veur alle verdeenste veur de Beeselse vastelaovend. Biezónjer is det Frank zelf ’t Bartje ‘n hiel speciaal initiatief vónj. Frank, haopelik kiek se sjtiekem mit ’n gruuëts geveul van dao baove mit.💙💛