Volgende waek vriedig, 25 fibberwari, rope veur de nieje Jeugprins(es) oet! Róndj de klok van 9.11 oer verzamele de kinjer van basissjoeël ’t Spick zich oppe Mert. Dao kump de draak nao boeëte, mit dao ónger de nieje veurgenger van de Jeugvastelaovend. Oeteraard ziet geur ouch allemaol van herte oetgeneudig óm te kómme kieke! Moch ’t waer te sjlech zien, den gaon de kinjer nao de zaal van De Troubadour, en blieve de elders baove in de kefee. De nieje Jeugprins(es) geit aansjloetend mit nao de sjoeël óm dao geliek flink te gaon fieëste!

Vriedigmiddig kènne de kinjer, as de sjoeël oet is, ’n lekker breudje knak gaon aete bie De Troubadour en is d’r aansjloetend toet 16.30 jeugdanse bie de Blokhut (zaal aope vanaaf 13.00 oer)! De kleinste kinjer kènne terech in de zaal van de Troubadour óm dao lekker te rouze tösse de blónne en confetti terwiel pap en mam zich ammezere in de kefee.

Op zaoterdig 26 fibberwari trèk de nieje Jeugprins(es) én jeugraod van 13.00 tot 15.00 oer op häöre prinsewage door de sjtraote van Beesel! Hang de Beeselse drakevlag oet en kóm nao boeëte as geur de meziek huuërt aankómme. 

Van 18.30 toet 21.00 oer is d’r veur de kinjer weer jeugdanse in de Blokhut. Tiedes dees twieë daag jeugdanse kènne de kinjer veur 50 cent get te drinke kriege of ’n zekske chips koupe. Begeleiding is aanwezig, zoeëdet de kinjer neet zelf nao boeëte gaon. Elders waert waal verzóch óm de kinjer zelf op de eindtied bie de Blokhut op te haole. 

Zónjig is d’r ’n besjlaote ‘aopelóch’ receptie bie de nieje hoeëgheid veur de deur. Vereiniginge en femilie óntvange hieveur ’n oetneudiging.

Veur haope d’r op dees meneer veur alle jeug van Beesel en oeteraard ouch veur de jónges en maedjes van de Jeugraod nog ‘ne hiele sjieke vastelaovend van te make!