Leef Drakinne en Drake,

Op dit moment is ’t waal dudelik. ’t Kómmend jaor motte veur ’t nog mit prins Tim I, II, III doon en motte veur nog effe undercover wier. Ich haop det veur later kènne zègke det ich de enige prins bön dae langer wèt det d’r pins zal waere as det ich oeteindelik ech Drakeprins zal zien.

Gelökkig bön ich neet zónne praoter, mer nog ’n gans jaor zjwiege waert zelfs veur mich lastig. Det ich dao same mit miene adjudant op de bühne sjtaon, sjpook namelik dök door miene kop. Ich zal mien gedachtes verzètte en d’r veur noe mer ’t bèste van make.

Dit haaj ós jaor motte waere, want miene adjudant haet ‘jao’ gezag, dus ich sjtaon d’r gelökkig neet allein veur. Veur höbbe same dit geheim. Daoróm waas dit ouch de juuste keuze. Want zoeëas ’t bie ‘ne gooje adjudant huuërt, sjteit dae altied klaor asse ‘m nuuëdig höbs.

Veur vinje ’t ontzettend jaomer det veur dit jaor gènne Beeselse vastelaovend kènne viere. Mer sjnappe de keuze van de carnavalsvereiniging hiel good. Wie kènse in deze tied zorge veur ‘ne fantastische vastelaovend? Zoeë eine dae veur allemaol weer verdene en waobie alle Drakinne en Drake weer same kènne zien en veural same dit geweldige fieës kènne viere. Want det is wao de vastelaovend óm dreijt!

Same zien, mit jónk en aad plezeer make, van sjmorges vruuëg toet saovens laat ‘n fieësje bouwe zoeëas veur det allein in Beesel kènne. Det is veur ós vastelaovend.

Veur gaon d’r mer effe vanoet det de nieje jeugprin(es), de Bacchus en ouch ’t boerebroedspaar d’r hielemaol klaor veur ware. Veur kóste in èlk geval neet mier wachte, mer wachte is waat veur zölle doon.

Ich haop det veur volgend jaor waal weer de Beeselse vastelaovend kènne viere zoeëas veur det gewènd zien. Mit zien alle same, laote veur zeen wao veur as klein dörpke groeët in zien.

Haopelik blief geur allemaol gezóndj!
De toekomstige drakeprins 202(3)…?