Leef Drakinne en Drake,

Dit waas de vastelaovend 2021. Normaal gesjpraoke is de kastelein noe de vloer aan ’t sjroebe, zin veur de confetti oet de tesse aan ’t plökke en verrek… kump se dao toch nog ’n lètste bón taege. Mer dit jaor neet. De vastelaovend van dit jaor geit de gesjiedenisbeuk in, al zoje veur ‘m ’t leefste zoeë sjnel meugelik wille vergaete. De draak kwaam alleein oet de bôch óm zich effe bie uch thoes op ’t sjerm te laote zeen tiedes ’t filmke van de revue. Oeteraard mit ’n móndjkepke op.

Veur haope det geur gewaardeerd höb waat De Drake veur uch höbbe neergezat en det veur uch d’r effe aan höbbe kènne herinnere det ’t vastelaovend waas! Of geur noe die Spotify-playlist höb griesgedreijd, geprobeerd höb óm die 66 vraoge bie te haje tiedes Troubie’s Drake Quiz, of ós gezet én opsjtaeker höb gekóch (ajerwèts contant betaald of niejerwèts gepind).

’t Feit det veur gèn gezet mier euver höbbe, det zaet eigelik waal genóg! Det duit ós vastelaoveshert good. Laot ós haope det veur volgend jaor weer gewuuën ‘ne vastelaovend in ós Drakeriek höbbe, zoeë as veur gewènd ware van veur corona. Alhoewaal gewuuën… huuërde veur burgemeeister Bob neet, tiedes ‘Op bezeuk bie Bob’, toezègke det veur ’n tent oppe mert kriege? Det belaof get veur volgend jaor!

Drakinne en Drake, bedank veur uch sjteun! Blief gezóndj en toet sjnel.

CV de Drake