Datum/Tied
zaterdag 13 september 2025
14:00 - 15:30 oer

Op zaoterdig 13 september trèkke ’n aantal bekènde Limburgse vastelaovesartieste oppe fiets van Eijsde tot de Mookerhei. En ze make óngerwaeges ‘ne biezónjere tössesjtop in Beesel!

Ónger angere Hoondervel, Rempetemp, Andy & Roy en Bjorn (zónger Mieke) sjtappe oppe pedale veur dees unieke fietstoch door Limburg. Tösse 14.00 en 15.30 oer haje ze pauze in Beesel, wao ze geniete van ‘ne welverdeende lunch in samewèrking mit aetkefee De Troubadour. Mer det is nog neet alles, tiedes häöre sjtop verzorge de artieste ouch ’n mini-concert op ’t terras van De Troubadour! ’n Unieke kans óm dees toppers van doeënbie te zeen én te huuëre, midde in ’t hert van Beesel.

Ouch de prinskeuzekemissie van vastelaovesvereiniging De Drake kump dae middig in actie: van alle kandidate die dit jaor oppe Beeselse prinskeuzelieës sjtaon waere de bölles én de sjoonmaot opgemaete. Want allein de kandidaat mit ‘ne keuninklikke kopómtrèk en ’n vorstelikke sjoonmaot moog in de vootsjpaore traeje van prins Largo!