Bèste Drakinne en Drake,
‘t Begós allemaol op ‘ne aovend dae ich neet sjnel zal vergaete. Dao sjting ich oppe oprit, midde in de totale zonsverduustering, en dao sjting in eine kieër de vors veur mien naas. Of det op zich al neet genóg waas, kwaam dao ouch nach die vraog achteraan wao det geur uch inmiddels waal get bie kènt veursjtèlle… Of ich de nieje Drakeprins wooj waere.
Ich mót zègke: mien ieërste reactie waas direk enthoesias. Want jao, es die vraog dao in eine kier kump, den gebeurt d’r waal get mit dich. Mer tegeliek kwame d’r ouch drek ‘ne hieële houp vraoge in mich op. Waat kump d’r allemaol bie kieke? Waat waert d’r sjtraks van ós verwach? Wie gaon veur det allemaol geregeld kriege? En nach ‘n vraog of hóngerd dao achteraan.
Dus gènne directe ‘JAO!’ van miene kantj. Ieërs effe alles op ‘n rieke zètte. Mer hieël lang höb ich dao neet veur nuuëdig gehad. Twieë daag later haaj ich alles veur michzelf op ‘n riej en waas ‘t dudelik: dit wil ich doon. Dus de vors kreeg mien definitieve jao-waord en vanaaf det moment waas d’r eigenlijk gènne weg mieër truuk.
En den kump natuurlijk ein van de belangriekste opdrachte as prins in veurbereiding: de adjudante. Die kènse natuurlik gewuuën belle en vraoge: “Höbse zin om adjudant te waere?” Mer det vónj ich toch get te gemekkelik. Dus dao höb ich get angers op bedach. Op ‘n originele meneer zien ze verras en gelökkig waas ‘t enthousiasme minstens zoeë groeët es bie mich. Vanaaf det moment waas ‘t neet mieër allein mien avontuur, mer ós avontuur.
Neet väöl later sjting de ieërste echte geheime vergadering op ‘t programma. Ich kreeg ‘n locatie door en dach nog: wao sjture ze mich in godsnaam naotoe?
Veur kwame oet bie zo’n ech dónkerbroen kefee, ‘n bietje à la Sef Janisse, örges midde in de middle of nowhere. Zo’n plek wao se allein al van de veurdeur ‘t geveul kriegs det dao gèn tillefoons, foto’s of getuge thoeës huuëre. En ich mót zègke: dae ieërste aovend waas prachtig.
D’r is óntzettend väöl gelache en in ‘t begin waas ‘t veural gezelligheid. Mer nao ‘n paar pötjes beer en ‘ne houp sjterke verhaole, kwame langzaam ouch de serieuzere zake oppe taofel. Want prins waere is natuurlijk geweldig, mer d’r kump sjtiekem toch waal get mieër bie kieke es allein ‘n pak aantrèkke, ‘ne scepter vashaje en aaf en toe ‘alaaf’ rope.
Langzaam waerde dudelik waat d’r allemaol geregeld mót waere, wao veur euver nao mótte dinke en welke verantwoordelikhede daobie huuëre. En ich kèn uch vertèlle: det is mieër es ich van teveure haaj gedach. Mer det maak ‘t juus ouch prachtig.
Inmiddels zitte veur midde in de veurbereiding. D’r waert geregeld, bedach, euverlag en natuurlik ouch genóg gelache. Langzaam begint alles vorm te kriege en wie mieër d’r geregeld waert, wie mieër zin veur kriege in waat ós te wachte sjteit. Zelfs de pakke zien inmiddels gepas.
Det waas ouch nach ‘n belaevenis op zich. Ich en nette pakke… det mót toch altied effe wènne. ‘n Pantalon, ‘n jeske, alles netjes op maot. Veur höbbe ószelf ‘ns good in de sjpegel bekeke en kómme toet de conclusie det ‘t mit ós maote waal good kump. Gelökkig höbbe veur inhoud zat!
Noe geit ‘t langzaamaan ech beginne. D’r mót nach zat gebeure en d’r ligk nach genóg werk veur ós, mer ein dink is zeker: veur höbbe d’r óntzettend väöl zin in. Veur kieke oet nao ‘n sezoeën mit väöl lol, prachtige momente en haopelik ‘ne vastelaovend wao veur nog jaore euver naokalle.
Mer veurdet ’t zoeëwieëd is… nach effe de móndj haje.
Drakeprins 2027