In ’t vastelaovessezoeën 2027-2028 besjteit CV De Drake 7×11 jaor! Det viere v’r natuurlik gaer mit ’n gevarieerd jubeleumprogramma. De kertrekkers van dit jubeleum kómme neet oet de vastelaovesvereiniging zelf, mer zin juus dao boeëte gekaoze. Ouch al zin ze neet van de vereiniging, vastelaovend viere zit häör alle drie in ’t blood.
Ze woeëne alle drie in dezelfde sjtraot: veurzitter Floris Peeters, secretaris Danielle Adams én penningmeister Maarten Verlinden van ‘t 7×11-besjtuur. En toch zien ze alle drie op ’n versjillende maneer benaderd. ‘Vors Mark benaderde mich’, vertèlt Floris. ‘En den kèn se natuurlik neet weigere… Nae, flauwekul natuurlik; ich zoog ’t as ’n einmalige kans óm ‘ns get niejs te gaon doon. Ich zèt mich al jaorelank in veur de jeug in Beesel, det geit langzaam op ’n lieëger pitje. Dus vinj ich ’t leuk óm ‘ns gans mit get angers bezig te zin.’
Superleuk
Maarten waerde gebeld door veurzitter Marcel. ‘Bie ’t veurige jubeleum höb ich dezelfde rol gehad. Ich wèrk in de financieje, dus den kómme ze al gauw bie mich oet. Destieds waas ’t superleuk om te doon, dus alle raeje óm det nog ‘ns te doon.’ Bie Daniëlle ging ’t gans angers: ‘Bie mich ging det gepaard mit ’n aetentje! Penningmeister Rick wis mich net op ’t moment det ós partners efkes weglepe te vraoge hieveur. Ich zit in ’t besjtuur van ROKA, dus ich wooj waal get mier wete waat ’t ging inhaje, veurdet ich jao kós zègke.’
Sjiek programma
Mer waat ’t precies geit inhaje: det is nog ’n groeët vraogteiken. Floris: ‘V’r sjtaon nog ech aan ’t begin van ’t hiele gebeure. Vanoet de vastelaovesvereiniging is gezag: geur moog los! Oeteraard mit waal get kaders en restricties, mer veur de res is ’t ech aan ós óm ’n sjiek programma neer te zètte.’ Det hove ze euveriges neet mit z’n drietjes te doon. ‘Gelökkig neet’, zaet Daniëlle. ‘Dao gaon v’r sjtrakkes veural ouch angere bie betrèkke. Mer det kump as de hooflieëne sjtaon’.
Ellef activiteite
Bie ‘t 6×11-jäörig jubeleum waas ‘t ech ’n fieësweekend in de zomer, herinnert Maarten zich. ‘Dit kieër geit det angers waere. ’t Idee is om tösse de ellefde van de ellefde 2027 en halfvaste 2028 ellef activiteite te organisere. Daobie kieke v’r nao nieje initiatieve, mer ouch nao ’t verleje. Missjien zin d’r dinger die ouch noe weer keileuk zoje zin.’
Creativiteit
’t Lieëk nog bès lang, mer Floris is blie det dit al zoeë vreug op touw waert gezat. ‘Qua locaties is ’t in Beesel ’n oetdaging. Mer ouch ’t boeke van artieste mót al supervreug gebeure, angers vès se achter ’t net. ’t Geit dus bès get creativiteit vraoge óm dit good vorm te gaeve.’ Aan enthousiasme ligk ’t in idder geval neet: dees drie höbbe d’r zin in! ‘Veur vinje ’t allemaol belangriek óm ós in te zètte veur ’t dörp. As nemes get organiseert, gebeurt d’r ouch nieks. Det laote veur natuurlik neet gebeure!’
Höb se zelf ’n idee? Of wilse get beteikene – noe of sjtrakkes – in de veurbereidinge op ’t jubeleum? Laot ’t ós weite via info@cvdedrake.nl.