Bèste Drakinne en Drake, 

De 11e van de 11e is weer gewaes en daomit is ouch mien vastelaoessezoeën officieel van sjtart. ’t Gesjteuk in ’t dörp begint ouch op gang te kómme en ’t is sjoeën det veur väöl versjillende name veurbie huuëre kómme.  

De tied vluug, Sinterklaos is ‘t landj oet, dus nog mer ein anger fieës veurdet os fieës ‘de vastelaovend’  geit beginne. Want ’t zien nog mer 5 waeke toet veur 17 jannewari ónger dae draak oet moge sjpringe. Langzaam beginne alle puzelsjtökskes inein te valle en kènne veur, waat de vastelaovend betruf, mit väöl rös richting de fieësdaag gaon. 

Ich kèn uch verklappe det óngertösse de pakke zien opgehaold, de sjoon passe en kènne ingeloupe waere en ouch de sjteek pas op miene bol. En waat sjteit det gaaaaf. De meiste lieëste wao de PKC ós óm haet gevraog zien klaor. En ouch höbbe v’r ‘ne sjpreuk verzónne. Sjtieëds mier lampe sjpringe op greun. Veur kieke d’r nao oet óm ónger dae draak oet te sjpringe en same mit uch vastelaovend te gaon viere! 

Ich laot waeks veur ’t oetrope nog ‘ne lètste kier via deze waeg van mich huuëre. Veur noe wille veur uch alvas fijne fieësdaag winse en ‘ne goeje roetsj! 

Drakeprins 2026