Leef Drakinne en Drake,
Dao bön ich den mit mien lètste daagbook veurdet ich en miene adjudant tiedes de Nach van de Prins op 1 fibberwari eindelik ónger de draak oet moge kómme! Het is bienao neet te geluive det ‘t al drie-en-‘n-halve maondj geleje is det ich gevraog bön óm uch as Drakeprins veur te moge gaon mit de vastelaovend. En waat is de tied veurbie gevlaoge!
En waat höbbe v’r väöl mótte regele. Mer ich kèn uch vertèlle: ‘t is allemaol gelök, mede dankzij miene topadjudant. Veur hübbe same mierdere zeer geheime biejeinkómste gehad in erg leuke kroegjes far far away en ónger ‘t genot van hiel get pilskes is ‘t ós gelök óm alles waat v’r gaer wille ouch te realisere (mót waal zègke det de paracetamol daags daonao gèn euverbodige luxe waas, pfff)
Dus miense, ‘t prinse- en adjudantepak zitte as gegaote, de maot van de nieje sjteek is perfek, de vaere zin geweldig, de sjoon zin ingeloupe en gepoets, de sjpreuk knalt van de posters en de foto’s zin fantastisch, dus ’t fieës kèn beginne!
Mer den… as dondersjlaag bie heldere hemel gebeurt d’r get waat ich nog sjtieëds bienao neet kèn bevatte. Ózze geleefde kastelein, aad-prins en ieëredraak Rob van de Troubadour is euverleje. ‘t Waerde sjtil in ‘t dörp, ongeluif en de drakevlag ging halfsjtek.
Wat waas ‘t fijn det Christel de Troubadour nog dezelfde daag äöpende zoeëdet de Beeselse miense elkaar kóste treuste en sjteun zeuke bie elkaar. Ouch de ieërehaag nao de oetvaartbiejeinkóms waas zeer indrökwèkkend en bewees nog mer ‘ns wieväöl Rob heat beteikend veur de ganse gemeinsjap.
Ich dach zelf nog ‘ns truuk aan die kiëre det ich bie Rob aan de bar zoot, sjtómme kal verkoupe ónger ‘t genot van ‘n lekker pilske. Al die kieëre det veur same deje sjteuke euver waem d’r prins zooj kènne waere. En waat haajs doe ‘t dök good! Ich bön d’r van euvertuug desse ouch dit jaor weer veurop haajs geloupe mit ‘t sjteuksjpel. En dit jaor sjtaon ouch ich oppe lieës, dus wie moeilik haajse ‘t mich den missjien waal gemaak… Ich zal ’t noeëts weite helaas. ‘t Is allemaol veurbie, dae tied kump noeëts mier truuk. Tsju, waat gaon ich dich misse!
Mer noe mótte v’r wier, wie den? Väöl ónzekerheid, mer ein dink weit ich waal. Rob haaj wie den ouch gewild det de vastelaovend doorgeit in ‘t Drakedörp. Mer in welke vorm, det gaon v’r nog zeen. Veur blieve den ouch neet sjtilstaon, mer gaon door… De veurbereidinge zin weer opgepak en langzaam laeve v’r weer toe nao de vastelaovend.
En noe is ‘t nog drie waeke wachte toetdet v’r tiedes ‘ein groeët circus’ de piste moge betraeje. Ich waas al enigszins nerveus, mer det sjtijg langzaam nao ‘n hoeëgtepuntj. Óndanks alle gebeurtenisse de aafgeloupe waeke zin ich en miene adjudant d’r van euvertuug det veur d’r same mit uch ‘n geweldig fieës van gaon make!
Ich zègk: Alaaf!
Drakeprins 2025
