Geur höb de oproop mesjien al ‘ns veurbie zeen kómme. Mesjien waal dökker. Want wao veur ieërs de oproop deje nao de sjoeëlverlaoters van 2022, waerde dao later nog de sjoeëlverlaoters van 2023 aan toegevoeg. De raeje…? Te weinig animo. 

Coronajaore

Door de coronajaore is de laeftied van de jeugraod ‘n klas hoeëger gewaore. En zoeë zitte noe kinjer in de jeugraod die in de derde klas van de middelbare sjoeël zitte. V’r merke det die lever häör eige planne trèkke. Veur ós as vastelaovesvereiniging waas ‘t daoróm belangriek óm ech truuk te gaon nao ‘ne jóngere groep. 

Angere aanpak

Daoróm noe ‘ne nieje aanpak! Alle kinjer die gebaore zin in 2010, 2011 en 2012 kènne zich opgaeve óm bie de jeugraod te kómme. Daodoor kriege v’r ‘ne anger samesjtèlling, mit mieërdere laeftiedsgroepe doorein. En kènne kinjer ouch same mit vriendjes en vriendinnetjes oet anger sjoeëljaore same in de jeugraod. Oet ervaring weite veur det ouch kinjer die missjien neet zoeëväöl mit ein höbbe of elkaar nog neet zoeë good kènne, door same vastelaovend te viere ‘ne superleuke tied belaeve in de jeugraod! 

Biekómmend veurdeil is det de jóngere kinjer – as zee ’t sjiek vinje – volgend jaor nog ’n jaor mit moge doon. En as ’n jónger kindj noe nog neet wilt, is d’r volgend jaor nog ’n kans.

Gaef dich op veur de infoaovend!

Huuërt uch kindj bie de doelgroep? Gaef uch den in idder geval op veur de infoaovend op 17 juni óm 20.00 oer in de Blokhut van Jong Nederlandj! Opgaeve kèn via dit formulier of via ‘n mailtje aan jeugcarnaval@cvdedrake.nl. De kinjer die zich al ieërder höbbe aangemeld kriege ‘n berichje via de app of mail (check ff de spam!) mit ‘n oetneudiging veur de infoaovend. Pas nao de infoaovend kènne de kinjer zich definitief opgaeve veur de vastelaovend 2025.