Veur ware d’r de veurige kier toch al oet? Dae sjpreuk…?! Nou nae, dae ligk dus in de ummer. Nummer twieë waas ouch effe leuk, maar ouch dae… in de ummer! Zo’ne sjpreuk mót natuurlik waal örges op sjlaon en hae mot veural good veule. Maar noe zien v’r d’r ech oet. Dink ich… 🤔😂
Nao de veurige kier sjteit de waereld oppe kop en is d’r van alles gebeurd. Óngertösse is mien nieje vastelaovespekske aangemaete (det sjteit eigelik waal erg sjiek!) en höbbe veur al get geheime óntmoetinge gehad in vage dubieuze kefeekes die nemes wèt te vinje. Dao waert alles mit dich doorgenaome. Waat van dich verwach waert, waat d’r op dich aafkump en waem allemaol op de huuëgte is det ICH de nieje prins van de Drake waer. 🤩
Oh ja… prinsekemissie… noe veur ‘t dao toch euver höbbe… ich mot get opbiechte! Ich höb ‘t toch aan emes vertèld waem ich erg leef höb. Maar gènne paniek. Bön d’r van euvertuug det zo’n groeët geheim dao veilig is. 🤐
En den de 11e van de 11e! Waat ‘n fieës waas det. Sjiek en ouch ‘n bietje ‘n gek geveul. Dao sjteise dae daag tösse allemaol die gesjmienkte sjnoete in de wetesjap det die sjtraks mit de vastelaovend weer zoeë geschmienk zien, mer det miene adjudant en ich den ‘n gans anger pekske aanhöbbe! Maar waat ‘ne speciale daag waas det. Veur ware door ‘t dólle haer. ‘t Leek waal as of ‘t al volop vastelaovend waas. Wie sjlordig… en wie sjiek! 🥳
De vastelaovesmuziek sjteit hiej al ‘ne hiele tied daag en nach aan. Bie miene adjudant trouwes ouch. D’r is idder weekend waal ’n raeje veur ’n fieësje en den geit éch ’t daak d’r aaf! Maar ja, noe toch iers nog efkes de fieësdaag in! Ich dink det hiej dit jaor mier vastelaoves- as körsleedjes waere gedreijd. In plaats van ‘ne witte körs, waert ’t ierder ‘ne körs mit confetti! En den rap 2023 oet roetsje. Kèn neet wachte op volgend jaor!
Óngertösse waert d’r op de site van de CV volop gesjtump en geraoje op de 11 name van de nieje prins. Gelökkig vèlt ‘t kommentaar op sjtraot mich hiel erg mit en zit mer ‘ne inkeling op mich! En as emes d’r nao vreug, mósse efkes mit ‘n sjtaole gezich ‘n klein leugentje vertèlle. Den sjtaon ich d’r weer get baeter, of ja… sjlechter veur.😉
Prins… de zoeëväölste!
