Veur zien d’r oet! D’r blief sjtieëds eine sjpreuk euver dae bie miene adjudant en mich door de kop blief zjweve. Dus ‘t besjloet is vanaovend genaome… dao gaon veur veur!
Oh wach… dit is ‘t ieërste daagbook. Dao waert natuurlik verwach det ich vertèl wie det allemaol ging. Ech, mot det? Det is 9 van de 10 kieër toch ‘t zelfde….? Nou, allá den. Kump ‘t!
‘t Waas örges midde september wie vors Mark mit de vraog kwaam. Jao… det laes g’r good… midde september! Ich weit neet wie t bie uch is, mer ich bön den neet bezig mit prinskandidate! Dus wie ich op miene tillefoon dae van Selen zoog, waas mien ieërste reactie ‘waat mot dae noe?’. En den kump dae mit die bekènde vraog. Nou, ich mot zègke, det kwaam bes effe kaad op mien daak! Ich mein mich te herinnere det mien ieërste wäörd ware: ‘och gank weg…’ Neet éch väölbelaovend, hè?! 😂
Mer alle gekheid op ‘n sjtekske… Prins van de Drake, ich? Det waas waal ‘t lètste wao ich mit bezig waas dae aovend! En geliek nao die vraog, begint d’r van alles te ratele dao baove in de kop: waat vinjt Beesel daovan, waat vinjt miene partner daovan, waem kees ich as adjudant? Mer op ein of anger maneer sjakelt den toch diene vastelaovesmodus in en zaese ‘jao’. Want laote v’r ieërlik zien, die kans kriegse mer eine kieër!
Nog get aajhore mit de Vors van de Drake, nog efkes biekalle mit miene partner en den probere te sjlaope. Det ging mich verrassend good aaf! Ich kin uch zègke, d’r zien miense die höbbe sjlechter gesjlaope die nach! Hè sjat?! 😆
Den ‘the day after’ gewuuën aan ‘t wèrk mit de gedachte soms weer effe bie die eine vraog ‘waem waert miene adjudant?’ Mer naodet v’r ‘t dao thoes same nog effe good euver höbbe gehad, waas ‘t eigelik sjnel dudelik. Dét geit ‘m waere!
Mit ‘n sjlap excuus miene adjudant oetgenuuëdig bie ós thoes. ‘t Waer waas väöl te good óm binne te zitte, dus paote veur ós nog lekker boeëte neer. Op zich prima… mer d’r branjt mich ‘n vraog die ich boeëte éch neet kèn sjtèlle. Sjtel det emes det huuërt! Mit ’n nog sjlapper excuus is ’t mich gelök óm ’n moment te vinje óm efkes nao binne te gaon. De deur is nog neet good en waal toe en de vraog vluug d’r oet! ‘t Antjwaord? Beer, traone, Zeute Draekskes, mier beer én nog mier alcohol. Dus jao, det zit waal good! 🍻
Noe efkes alles good laote lanje. Mer dao höbbe veur nog waal ‘n paar maondj de tied veur.
Prins… de zoeëväölste!
