Leef daagbook,

’t Aaftèlle is noe ech begós. Nog mer ’n paar kier toet ellef tèlle en den kènne v’r d’raan. Ich kèn mit uch deile det ’t pak gelökkig nog pas. Det waar toch nog waal efkes sjpannend, naodet det al dae tied örges good bewaak in ‘ne kas haet gehange. De foto’s zien klaor en al zègk ich ’t zelf: ze zien erg good gelök. 

’n WK in de wintjer? ’t Veult ’n bietje wie vastelaovend in de zomer. Baeter as nieks, mer ’t veult neet wie normaal. Veur höbbe ’t WK den ouch gebroek óm nog ‘ns good te oefene mit drinke, zoeëdet v’r kommend jaor de raod van ellef ouch ’n bietje kènne biehaje.
Ich mót waal zègke det miene adjudant ’t d’r zjwaor mit haet gehad, dae is nog ‘ns mit flinke koppien wakker gewaore. Mer ouch det euverlaef d’r waal. 

De aafgeloupe tied höb ich al flink get sjtökke gesjreve, ’t waert noe langzaam tied óm elkaar in ’t ech te zeen. Bienao, ’t doert neet lang mier. Mer toet dae tied mót geur ’t mit mien daagbook doon. 

Op de site van De Drake kènt geur allemaol sjtumme op de nieje prins. Waat sjiek óm te zeen waem geur allemaol ‘ne goeje prins vinjt… 

De ieërste activiteit in ’t nieje jaor is ’t Bacchusoetrope. Ich wins de nieje Bacchus mit zien adjudante hiel väöl plezeer en veur gaon d’r vas en zeker same ‘ne geweldige vastelaovend van make. Missjien kóm ich 7 jannewari waal efkes kieke wie des dich ’t d’r op de bühne vanaaf brings. 

Veur noe winse veur uch allemaol fijn daag en ‘ne goeie roetsj! Toet volgend jaor. 

De nieje drakeprins