Bèste Drakinne en Drake,

In juli höbbe veur aangegaeve det veur bie uch truuk zoje kómme wie veur de vastelaovend in 2021 gaon vormgaeve. ’t Is waal dudelik det ’t coronavirus nog sjteeds óm zich haer griep. Veur höbbe mit de Beeselse kasteleins en mede-organiserende vastelaovesgezelsjappe, mer ouch mit burgemeister Bob Vostermans en ós vastelaovesvrunj van de Ruiver euverlag waat wiesheid is. 

Same höbbe veur ’t weleuverwaoge en ouch moeilikke besjloet mótte numme det vastelaovend viere zoeë wie veur det gewènd zin, helaas in 2021 neet meugelik is. Wie gaer veur det ouch zoje wille: de óntwikkelinge óm ós haer laote zeen det same vastelaovend viere neet veilig is. De gezóndjheid van idderein sjteit altied veurop. 

De activiteite die geur van ós gewènd zin, gaon dus neet door. Det beteikent dus ouch det Drakeprins Tim I mit adjudant Luuk de gesjiedenisbeuk ingaon en veurluipig neet aaftraeje; det beware v’r veur ’t sezoeën daonao. D’r kump ouch gènne nieje jeugraod. Kinjer die dit jaor aan de beurt zoje zin, wille veur in 2022 opniej de kans gaeve. Waal traeje jeugprins Thijmen I en adjudant Tren op ’n nader te bepaole moment aaf, noe ’t pak häör nog pas… 

Veur blieve de óntwikkelinge volge en gaon kieke waat dit beteikent veur eventuele ludieke sjpontane ideeje róndj de vastelaovestied. Ouch bekieke veur wie veur uch in dae tied toch ’n bietje vastelaovesgeveul kènne gaeve. Veur haje uch dao oeteraard van op de huuëgte!

Toet sjlot wille veur de horeca sjterkte winse, want mit name veur häör is dit ‘ne flinke dómper. 

Veur make ós op veur ’n röstig jaor, mer gaon – haope veur – de vastelaovend in 2022 knalle es noeëts teveure! Natuurlik ónger ós motto: ‘veur zin d’r óm uch te ammezere’ – mer waal allein es det verantjwaord kèn! 💙💛

Alaaf en blief gezóndj,
Vors Mark