Bèste Drakinne en Drake,
Op woensdig 24 juni zien veur op initiatief van CV de Drake biejein gekómme mit de kasteleins en mede-organiserende vastelaovesgezelsjappe. ’t Doel waas óm alvas ‘ne veurzichtige doorkiek te make nao de vastelaovend 2021 en de daobie geldende regelgaeving róndjóm ’t coronavirus.
Veur alle partieje is d’r op dit moment nog väöl ónzekerheid euver waat veur waal en neet kènne, moge en wille. Daoróm hóbbe veur aafgesjpraoke det veur begin oktoeëber de knoup doorhakke euver bepaolde cruciale keuzes die samehange mit ‘t sjlage van de vastelaovend in Beesel.
Tiedes deze aovend höbbe veur ‘n aantal alternatieve besjpraoke veur ‘t geval det de vastelaovend in 2021 neet gevierd kèn waere zoeëas veur det gewènd zien. D’r óntstinge ech leuke ideeje wao veur same mit de res van de vastelaovesgezelsjappe en kasteleins mit wier kènne. Aafhankelik van de besjloete begin oktoeëber waere dees ideeje verder oetgewerk.
De aanwezige ware ’t d’r same euver èns det d’r wie den ouch ‘n bietje vastelaovend mot zin in 2021! Belangriekste blief waal det veur binne de den geldende richlieëne idders gezóndjheid in ach numme.
Haopelik gaon veur – in ’t motto van ózze prins Tim I – dit same fixe!!!
Veur haje uch op de huuëgte en winse idderein ‘n fijne vakantie.
Alaaf,
Vors Mark