Tim Hendriks oetgerope as Drakeprins Tim I

Op zaoterdig 1 fibberwari is Tim Hendriks (27) oetgerope as prins Tim I van de Beeselse Drake. Tim geit same mit adjudant Luuk Simons deze vastelaovend veurop ónger zien motto:

De kersverse Drakeprins sjtudeert dit jaor aaf aan de Fontys Paramedische Hogeschool in Eindhoven, wao hae de opleiding Mens & Techniek differentiatie Orthopedische Technologie haet gevolg. De meiste Beesele miense kènne Tim as barman bie De Troubadour, wao hae inmiddels al ruum ach jaor werk in ’t weekend. 

In de tieëd dae euverblief voetbalt Tim bie de selectie van VV Bieslo, klus d’r gaer, hèlt d’r van snowbaorden en bringk d’r gaer tieëd door mit zien vriendin Lian. Ouch zèt hae zich gaer in veur ós Drakedörp: zoeë organiseert hae mit de Stichting Kermis Beesel sinds inkele jaore festiviteit tiedes de Beeselse kermès. 

Vastelaovesblood
’t Vastleoavesblood sjtruimp al van jóngs aaf aan door Tim zien adere. Ieërs mit pap en mam mit, daonao in de jeugraod en vervolges vierde Tim de vastelaovend jaorelank as lid van de Beeselse Bacchusklup. In 2016 waerde hae oetgerope as Bacchus, ónger ziene bienaam: Bacchus Fix. Deze bienaam haet Tim te danke aan ’t feit det hae dök waert ingesjakeld as d’r get gemaak, gedaon of gerepareerd mot waere. Waat d’r ouch gedaon mot waere: veur fixe ’t waal! 

As prins van CV de Drake geit veur Tim ’n jóngesdruim in vervölling. Same mit adjudant Luuk, wao hae al sinds de kleutersjoeël vrunj mit is, haet hae al de nuuëdige pilskes gedrónke. Noe zin ze klaor veur ’t echte werk: d’r same ’n geweldig fieës van make!

Receptie
Prins Tim I en adjudant Luuk neudige uch van herte oet op häör receptie op vastelaoveszaoterdig 22 fibberwari vanaaf 20.30 oer. Taege de klok van 22.45 oer make veur de bühne vrie veur de fieësband Sjloetingstied. Gaer toet den bie De Bongerd in Beesel! 

DeIl dit berich

Share on facebook
Share on google
Share on twitter
Share on linkedin
Share on pinterest
Share on print
Share on email