Vanmiddig is tiedes ’t Jeugdrakesjpektakel Thijmen Smeets oetgerope as jeugprins Thijmen I, de 66e heerser euver de jeugdrake! Same mit ziene adjudant Tren Reijnders gaon zie deze vastelaovend bie de Beeselse jeug veurop.
Thijmen is 13 jaor en zit in ’t twieëde jaor VMBO-T van de Broekhin in Remunj. Hae voetbalt al sinds zien zèsde en is aafgeloupe jaor ouch begós mit tennisse. Es d’r nag tieëd euver haet, sjpeelt d’r gaer Fifa oppe PlayStation en vinjt d’r ’t leuk óm mit zien vrunj te chille. Thijmen woeënt aan ’t Kèrkepaad mit mam Brigitte, pap André en zien twieë breurs Ruben (17) en Wessel (15). Van kleins aaf aan druimde Thijmen d’r al van óm prins te waere. Wie ‘m dit jaor de vraog waerde gesjtèld, hoofde d’r dus ouch gèn seconde nao te dinke!
Vanaaf de basissjoeël is Thijmen al bevrundj mit Tren. Dus de keuze veur Tren as adjudant waas sjnel gemaak. Ouch Tren zit in ’t twieëde jaor oppe Broekhin, mer den op ’t VWO. Hae voetbalt same mit Thijmen bie Bieslo en geit gaer skieje. Tren zien elders zin Rob en Simone Reijnders en hae haet nag ’n ajere broor Krijn en twieë ajere zösse: Fem en Jill. Same mit de jeugraod gaon Thijmen en Tren de vastelaovend belaeve ónger ’t motto:
Idderein is van herte oetgeneudig oppe receptie van Thijmen I en adjudant Tren in de Troubadour op zónjig 9 fibberwari vanaaf 14.30 oer.
Dit jaor pakke veur det angers aan as angers! De nieje jeugprins wilt väöl lever ’n fieësje bouwe as de ganse middig braaf oppe bühne te mótte blieve sjtaon. Wilt geur get zègke taegen Thijmen I, den doot geur det gewuuën oppe bühne as geur ‘m ’n hendje gaot gaeve. ’t Is dus de bedoeling det nemes echt geit ‘sjpraeke’ in ‘ne microfoon. Höb geur ’n veurdrachje of ’n aankondiging, den höbbe veur altied ‘ne microfoon achter de handj. Mer in principe is ’t dus: ‘Gènne bal rake, mer fieës make!’