Zo… ‘t is tied óm de ieërste kier van mich te laote huuëre…

Wie ‘ne druim begós?

‘t Moment zal ich noeëts vergaete. Nao thoes effe lekker get gegaete te höbbe, sjtap ich de auto in. Net op ‘t moment det ich van de plaats wil rieje, geit de tillefoon. Dus veur ich begin mit rieje, pak ich ieërs de tillefoon nog mer effe op. De persoeën aan de angere kantj van de lieën sjtèlt zich veur as Mark Selen. Ich höb gèn idee waoróm hae mich belt en vraog waat ich veur ‘m kèn doon. Dao op zaet Mark det d’r as nieje vors van CV de Drake ‘n vraog veur mich haet. D’r begint bie mich waal ‘n belke te rinkele.

Vors Mark vreug mich den ouch of ich de nieje Drakeprins van 2020 wil waere???

Mit dees vraog euvervèlt hae mich toch waal ‘n bietje. Ich weit effe neet waat ich mot zègke en vraog daoróm mer of ich d’r effe euver nao moog dinke.

As ich effe later de tillefoon opligk, merk ich det d’r al ‘ne houp gezónje sjpanning aanwezig is. Ich zit namelik aardig te razele in de auto. Deep van binne weit ich det ich op die vraog van de vors gèn nae kèn zègke. Ich höb ‘t effe laote bezinke en ‘n paar daag later höb ich vors Mark laote wete det d’r neet wieër hoof te gaon zeuke!!! Want JAO ich wil hiel gaer de nieje Drakeprins waere!

‘ne Houp vraoge zien d’r intösse door miene kop gegaon. Inmiddels höb ich op ‘ne houp vraoge ouch al antjwaord gekrege, mer dao zal ich de volgende kier get euver sjrieve.

Dees pagina steit al vol genóg.

De nieje Drakeprins