Mark Selen beneump toet vors van CV de Drake

Vriedig 11 oktoeëber is Mark Selen beneump toet vors van CV de Drake. Mark nump ’t sjtekske en de vaere euver van Harald Boots, dae de aafgeloupe jaor de functie van vors mit volle euvergave haet vervöld. Harald haet altied aangegaeve plaats te make zodra ‘ne gesjikte opvolger gevónje waas, en in de persoeën van Mark dinke veur dae in hoeës te höbbe.

Mark is gènne onbekènde binne de Beeselse vastelaovend. Hae is al vanaaf 2011 lid van CV de Drake en is ouch óngerdeil van de Raod van 11. Hae haet zich vanaaf ’t begin ingezatte veur de jeugcarnaval óm ’t vastelaovesfieës ónger deze doelgroep laevend te haje en zoeë de typisch Beeselse vastelaovescultuur ouch veur de toekóms veilig te sjtèlle. Nao actief te zien gewaes in diverse kemissies en de jeugraod ónger zien hoede te höbbe genaome, is hae in 2016 kertrekker gewaore veur de gezamelikke jeugkemissies, en is daobie ouch nog ‘ns toegetraoje toet ’t besjtuur van de carnavalsvereiniging. Die functies zal hae blieve bekleije en combinere mit ’t vors-sjap.

Mark is ‘ne echte Beeselse jóng. Hae haet waal get Ruivers blood in zich, mer is getaoge en opgegreujd in ós Drakedörp. Same mit zien vrouw Janne en dochter Fiene woeënt hae taegewaordig oppe Vosseberg. Janne – kleindochter van Opperdraak Jan Geraets – haet net as Mark zelf ’t nuuëdige vastelaovesblood door zich haer sjtruime, waodoor Fiene (2 jaor) ’t virus ouch mit de paplaepel ingegaeve krieg. In ’t dageliks laeve is Mark behalve papa en drök vereinigingsman ouch nog chauffeur bie AmbulanceZorg Limburg-Noord.

Vanaaf dees plaats wille veur Vors Mark natuurlik óntzettend väöl sukses en plezeer wènse mit zien niej functie binne CV de Drake!

DeIl dit berich

Share on facebook
Share on google
Share on twitter
Share on linkedin
Share on pinterest
Share on print
Share on email