Drakeprins 2019: Ruud I (Ruud van Deuzen)

Prins Ruud I (2019) Neet verzake, mer fieës make!

Zaoterdig 9 fibberwari 2019 is Ruud van Deuzen oetgerope as prins Ruud I van CV de Drake oet Beesel. Mit zien jóngere broor Niek as adjudant geit hae deze vastelaovend in Beesel veurop ónger zien motto:

In ’t dageliks laeve is prins Ruud (30) óngernummer/projecmanager bie zien eige ingenieursbureau United Engineers. Hae woeënt same mit zien verloofde Evelien. In ziene vrieje tied voetbalt Ruud in de selectie van VV Bieslo en in ’t twieëde elftal van zaalvoetbalvereiniging Tornado. ’n Angere hobby is snowboarde; wannier ’t efkes kèn, zeuk Ruud de snieëj op in Oeësteriek.

As adjudant kaos Ruud veur zien broor en bèste vrundj Niek (28), werkzaam as European Treeworker bie Herman Vaessen. Same haje ze waal van ’n fieësje viere en bedachte ze ’t motto ‘Neet verzake, mer fieës make!’. Want juus mit de vastelaovend waerde de sjoeënste herinneringe gemaak; de res van ’t jaor is ’t laeve al serieus genóg. Sowieso is de femilie van Deuzen ’n echte vastelaovesfemilie: Niek is lid van de Drakkapel, zus Lienke is ‘ne echte vastelaovesvierder en elders Jac en Leonne zin allebei lid van joekskapel Mazes Mina.

De receptie van prins Ruud I en adjudant Niek is op zaoterdig 2 mieërt vanaaf 20.30 oer bie De Bongerd in Beesel. Mit optraejes van Big Benny en LVK-finalis Hoondervel!

DeIl dit berich

Share on facebook
Share on google
Share on twitter
Share on linkedin
Share on pinterest
Share on print
Share on email