Al väöle jaore is Marcel en vertroewd gezich binne de Beeselse gemeinsjap. Ziene inzet kenmerk zich door betrokkeheid, doorzittingsvermoge, en de bereidheid om altied de henj oet de moewe te sjtaeke.

Zien vriewilligerswerk begòs al jaore geleje biej de Drakekapel, woe hae al zo’n 35 jaor actief is as sjlaagwirker. Mit zien kleine tròm is hae neet allein muzikaal belangriek, mer is hae auch ech eine gangmaeker. Letterlik het ritmisch hert van de Drakekapel. Daonaeve is hae al jaore penningmeister van dees kapel. Ein biejzonjer moment volgde in 2010, toen de kapel het Limburgs Kampioensjap Zaate Hermeniekes wòn. In 2011 organizeerde de kapel dit kampioensjap zellef. Marcel sjpeelde auch hiej in ein belangrieke rol. Toet op de daag van vandaag zit hae zich actief in om de kapel sjterk en toekomsbesjtendig te haaje.

In 2007 waerde Marcel besjtuurslid van carnavalsvereiniging De Drake en sinds 2011 is hae veurzitter van dees vereiniging.In die rol trèk hae ech de ker, mer is auch ein veurbeeld veur väöl miense door zellef mit te wirke dao hoe det nuedig is. Onger zien leiding waerde in 2017 het 6×11 jäörig jubileum groeëts gevierd en waerde ein succes.. Van de sjpeciale jubileumsjtichting waas hae de veurzitter.

Mit het 7 x 11-jäörig jubileum in aantoch haet Marcel aangegaeve det dit auch zien aafsjied as veurzitter zal beteikene. Marcel haet waal aangegaeve det der betrokke wilt blieve biej Carnavalsvereiniging De Drake.

In 2024 vervulde hae hieël gruëts de rol van adjudant van zien broor, Prins Patrick I en trooj hae toe toet de Raod van Ellef as geuniformeerd lid. Daomit bleef hae zich auch binne de vereiniging verder inzitte en ontwikkele.

Naeve het vereinigingslaeve haet Marcel zich auch sjterk gemaak veur de laefbaarheid in Beesel. Tösse 2018 en 2022 waas hae actief binne het initiatief Bliej in Beesel Drakedörp as projekleider van de wirkgroep Woeëne. Same mit deze wirkgroep ongerzòch hae de woeënbehoefte in de kern. Hiejoet bleek det der eine sjterke wins is biej jongere en aajere om in Beesel te blieve woeëne. Onger zien leiding waerde, same mit de gemeinte en ‘Woningvereninging Nester’, gekeke nao bouwlokasies en herbesjtumming van pande. Dit leidde toet het rapport  ‘Lokaal uitvoeringsprogramma wonen: kern Beesel’ in 2019.’ 

Auch daonao bleef Marcel betròkke biej dit ongerwerp. Auch daonao bleef Marcel betròkke biej dit ongerwerp. Veur Kernoverleg Beesel haet d’r auch ‘n besjtuursfunctie bekleijd, mit de portefeuille Woeëne. Hae fungeerde as klankbord veur de gemeinte en waas betrokke biej de ontwikkeling van de woeën-zorgvisie. Daonaeve organiseerde hae ein nieje inventarisasie van woeënwinse en begeleidde hae keuketaofelgesjprekke biej inwoeëners thoeës. Auch wirkde hae mit aan de organisasie van ein woeënmert in Beesel.

Waat al dees aktiviteite verbindj is ziene inzet, vriejwillig, betròkke en mit ein groeët verantjwaordelijkheidsgeveul. Marcel is emes dae dinger veur elkaar krieg, zonger zichzelf oppe veurgrondj te plaatse. De jaorelange en väölzijdige inzit van Marcel Aspers maak um van groeëte waerde veur de gemeinsjap. Daorom wille veur um names de ganse vereiniging proficiat winse mit dees Keuninklikke òngersjeijing.

Namens alle CV en ’t besjtuur CV De Drake,

Vors Mark

𝘔𝘪𝘵 𝘥𝘦 𝘰𝘱𝘣𝘳𝘪𝘯𝘨𝘴 𝘷𝘢𝘯 𝘥𝘦𝘦𝘴 𝘢𝘤𝘵𝘪𝘦 𝘴𝘫𝘵𝘦𝘶𝘯𝘵 𝘨𝘦𝘶𝘳 𝘥𝘦 𝘷𝘦𝘳𝘦𝘪𝘯𝘪𝘨𝘪𝘯𝘨 𝘣𝘪𝘦 𝘥𝘦 𝘰𝘳𝘨𝘢𝘯𝘪𝘴𝘢𝘵𝘪𝘦 𝘷𝘢𝘯 𝘢𝘭 𝘩𝘢̈𝘰̈𝘳 𝘷𝘢𝘴𝘵𝘦𝘭𝘢𝘰𝘷𝘦𝘴𝘢𝘤𝘵𝘪𝘷𝘪𝘵𝘦𝘪𝘵𝘦 𝘷𝘦𝘶𝘳 𝘫𝘰́𝘯𝘨𝘬 𝘦𝘯 𝘢𝘢𝘥 𝘪𝘯 𝘉𝘦𝘦𝘴𝘦𝘭.

De entree is gratis. Fris en chips zin te kriege veur ‘n klein bedraag.

Op zónjig en maondig is ’t Jeugdanse van 19.00 toet 21.00 oer en haolt geur de kinjer zelf op. Mer lèt op: op dinsdig geit ’t fieësje door toet 22.00 oer! Dae aovend bringe de Raod van Ellef en de Drakekapel de kinjer truuk nao de Mert veur de aafsjloeting.

En Jac haet ’t vastelaoveshert zeker op de goeie plaats zite! Zoeë sjpeelde hae ’n belangrieke rol in de toetsjtandjkómming van Mazes Mina, de BBBBB, de Kieërsekermis, de Hieërezitting en de Aajerwètse Vastelaoveszitting. Proficiat Jac en bedank!

Höb geur vandaag de verkoup van ós vastelaovesgezet ‘De Draaksjtaeker’ gemis? Ze zien later ouch veur € 6,- te koup bie Slagerij Killaars én frietwage De Smulboetiek as dae oppe mert sjteit!

Gaef uch den op! Idderein haet pries!

Juul is 12 jaor, zit in ’t ieërste jaor van BC Broekhin in Remunj en is in ziene vrieje tied gaer bezig mit Jong Nederland, tonieël, fröbele, knutsele en sjmienke. Juul is de dochter van Cyriel en Karlijn en haet ’n breurke Pieke van 10 en ’n zuske Joes van 4. Pap Cyriel en mam Karlijn höbbe zich tiedes de vastelaovend lieëre kènne, dus de vastelaovend zit ouch Juul in ’t blood. Al sinds ’t hiel klein waas, wooj ’t hiel gaer prinses waere. Dus wie ’t waerde gevraog, haet ’t natuurlik drek en hiel hel ‘JAO!’ gezag!

Echte vastelaovesvierders

D’r waas gènne twiefel euver waem adjudant zooj waere: det is natuurlik bèste vriendin Eva (Mommers). Eva is net as Juul 12 jaor en zit ouch in de ieërste, mer den op ’t Grescollege oppe Ruiver. Zien hobby’s zin voetballe en Jong Nederland. Ouch Eva haet ’t vastelaovesvirus neet van vraemde: zien mam Veronique is ‘ne echte vastelaovesvierder en breurke Luca waas ’n paar jaor geleje sjoeëlprins van ‘t Sjpick. 



Alles gaeve! 

Jeugprinses Juul I en adjudant Eva verheuge zich ’t meis óm mit idderein vastelaovend te viere –veural same mit häör vrunj en vriendinne van de jeugraod. Mer ouch mit de groeëte prins en de Bacchusklup natuurlik. Häör motto kump neet oet de lóch valle: ze gaeve altied 200% en gaon ’t leefs zoeë lang meugelik door mit fieës viere!

De receptie van jeugprinses Juul I en adjudant Eva vinjt plaats op zónjig 8 fibberwari vanaaf 15.00 oer in aetkefee de Troubadour. De jeug wilt d’r gaer ’n fieësje van make, dus leefs neet te väöl toesjprake, mer lekker same gaas gaeve!

In ’t dageliks laeve haet Jeroen (25) zien eige sjildersbedrief. Es d’r efkes neet mit ‘ne kwas of roller in de henj sjteit, is d’r te vinje oppe wielrenfiets en drink d’r ouch gaer ’n pötje beer mit zien vrunj. Hae is drök mit zien vriendin Lotte aan ’t verbouwe in ’t hoeës det ze same höbbe gekóch. Jeroen is de zoon van sjlechter Lambert en Ursula, breurke van zus Maud en twieëlingbroor van zus Eva. ’n Ech vastelaovesgezin, Jeroen wèt ouch neet baeter as det ze van kleins aaf aan altied d’r oet ginge mit die daag. Neet zoeë gek dus det hae op zien 14e bie de jeugraod kwaam en vanaaf zien 18e bie de Bacchusklup. Mit as hoeëgtepuntj det d’r in 2023 veurop ging as Bacchus Oetje.

Drakeprins Jeroen II (Killaars) en adjudante Ferd (links) en Sten (rechts)

Twieë man sjterk

Veur ’t ieërs in de Beeselse gesjiedenis, haet de Drakeprins dit jaor neet eine, mer twieë adjudante. Sten (Simons) is natuurlik gènne ónbekènde veur idderein dae waal ‘ns wie de Troubadour kump. Daonaeve haet d’r ’n eige bedriefke in leech en geluid en dreijt d’r muziek op fieëste en partieje. Ferd (Beek) wèrk bie de Koninklijke Marechaussee en is in ziene vrieje tied regelmaotig te vinje op de velde van Bieslo as lid van de selectie. Allebei is ’t vastelaovesgeveul häör net as prins Jeroen mit de paplaepel ingegaote.

Verras

Zoeëwaal prins Jeroen as de adjudante Sten en Ferd ware verras door de vraog die häör waerde gesjtèld. In positieve zin! Jeroen: “Ich waas drök aan ’t klusse wie vors Mark mich de vraog sjtèlde. Ich mós d’r efkes euver nadinke vanwaege alle verbouwwerkzaamhede op det moment, mer besefde al sjnel det dit natuurlik get hiel biezónjers is óm as Beeselse jóng mit te moge make.” Ouch Sten en Ferd zoge dit neet aankómme, mer weite ein dink hiel zeker: mit zien drieje gaon zie d’r ’n geweldig en ónvergaetelik fieës van make!

De receptie van prins Jeroen II en adjudante Sten en Ferd is op zaoterdig 14 fibberwari vanaaf 20.30 oer bie Hoeve de Bongerd.

As ieërste wil ich Bacchus Sjtroes en zien adjudante Joppe en Luc via deze waeg felicitere, maak d’r same mit uch klup en de res van ’t dörp ’n geweldig fieës van! Ich dink det veur d’r same nog ‘ne hiele houp gaon wegtikke dit jaor! Missjien höbbe veur ós al efkes gezeen aafgeloupe waek. Waem zal ’t zègke? Ich kiek d’r in idder geval erg nao oet óm same mit dich en mit de nieje jeugprins of -prinses de Beeselse vastelaoend veur te moge gaon dit jaor.

As twieëde, aafgeloupe maondj höbbe v’r veur ’t ieërs de kleijer aan gehad mit alle toeters en belle d’rop en d’raan, want veur höbbe namelik de foto’s gemaak. ’n Speciaal moment… en waat höbbe v’r gelache. Ich kèn waal zègke det de foto’s bès good gelök zin!

As derde wil ich d’r bie sjtilstjaon det ’t ech bienao geit gebeure. Dae tied is ech ómgevlaoge! Toen vors Mark vief maondj geleje in eine kieër veur mien naas sjting, haaj ich neet gedacht dat ’t allemaol zoeë sjnel zooj gaon. Alle veurbereidinge die getróffe zin, zin dankzij de PKC op rölkes verloupe.

Kómmende vriedig zal miene veurgenger prins Largo I zien vaere aafdrage tiedes ’t aaftraeje bie de Troubadour. En zal ’t de daag d’r nao aan ós zin! Veur zin d’r gans klaor veur!

Drakinne en Drake, ich zeen uch allemaol gaer zaoterdig 17 jannewari bie Hoeve de Bongerd. Veur noe sjloet ich dit daagbook. De volgende kieër det geur van mich huuërt, zal det vanaaf de bühne zin!

Alaaf!
(Bienaao) Drakeprins 2026