Daagbook van de nieje Prins (deil 3)

Bèste Drakinne en Drake,

Ten ieërste wil ich via deze waeg jeugprins Thijmen I en adjudant Tren van herte proficiat winse. Ich haop det geur ‘n fantastisch oetrope höb gehad en det veur d’r same ‘ne ónvergaetelikke vastelaovend van gaon make.

Den euver nao ós eige oetrope. Miene adjudant en ich zin d’r hielemaol klaor veur!

Noe de dameszitting en de hieërezitting achter de rök zin, is ‘t aaftèlle ech begós en kèn de Bongerd klaorgemaak waere veur de Bóntje Revues.

Nog ‘n paar daag en den is ’t zoeë wied. ’t Moment wao veur neet mieër op kènne wachte.

As ‘t good is, höbbe veur alles geregeld. De pekskes zin truuk van de sjtoumerie, die zeen d’r sjpik en sjpan oet. Alle besjtèllinge zien de deur oet en ouch al ‘t drökwerk is in de maak en – missjien waal ‘t belangriekste – de vrieje daag zien aangekruuts. Veur zin ouch waal ‘n bietje klaor mit ‘t zjwiege, det höbbe veur lang zat mótte doon.

Veur sjtaon den ouch te popele óm zaoterdigaovend ónger de draak oet te kómme as nieje Drakeprins en adjudant. Veur haope det, naeve alle Beeselse vastelaovesvierders, alle Beeselse hoeëghede met häör gevolg aanwezig zien bie ós oetrope, zoeëdet veur d’r mit zien alle ‘ne geweldige aovend van kènne gaon make.

Veur winse de miense die nao de Bóntje Revue gaon alvas ‘n sjoeëne veursjtèlling.

Den gaon ich noe dit daagbook sjloete en de pen neerligke, zoeëdet ich zaoterdig de scepter vas kèn gaon pakke!

Toet zaoterdig!!!

De nieje Drakeprins

DeIl dit berich