Daagbook van de nieje Prins (deil 2)

Zoeë, dao bön ich weer. Ieërs wil ich alle Drakinne en Drake nog ’n good en gezóndj 2020 winse.

Veur michzelf zal det neet zoeë lestig waere, aangezeen dit jaor veur mich geit beginne mit toch waal ‘ne speciale vastelaovend. Eine óm waarsjienlik noeëts mier te vergaete. Ich bön de körsdaag en de jaorwisseling in èlk geval good doorgekómme. Alle vingers zitte d’r nog aan, zoeëdet ich mit de vastelaovend de scepter ouch sjtevig vas kèn haje… en oeteraard ouch ’n glaeske beer.

Ich höb op väöl vraoge die ich haaj inmidels antjwaord, mer ’t belangriekste antjwaord is det miene adjudant ‘jao’ haet gezag op mien vraog of d’r mich bie wilt sjtaon tiedes de vastelaovend. Gènne twiefel; hae geit mich de vot naodrage mit die daag.

Noe ’t nieje jaor begós is, kènne veur óngerhandj al beginne mit ’t aaftèlle van de daag toet aan ós oetrope. ’t Geit toch aardig rap. Veurdesse ’t wèts, is ’t al zoeëwied. Al maak ich mich neet ech drök, toch mot d’r nog ‘ne houp gebeure. ’t Pekske en de sjteek zin in èlk geval aangemaete en ’t veulde good óm det pekske aan te höbbe. Noe nag ’n bietje aan de conditie wèrke, det is d’r mit de körsdaag en ’t nate waer ’n bietje bie ingesjaote. De kómmende waeke zin d’r alweer get vastelaovesactiviteite wao al de nuuëdige hoeëghede zich zölle prizzentere, dus v’r kènne alvas good in de sjtumming rake veur as ‘t 1 fibberwari veur ós den ech zoeëwied is. 

Ich wil via deze waeg Bacchus Klerke mit zien adjudante Sem en Sjeerd én Boerebroedpaar Twan en Ellen proficiat winse. Veur gaon ós mit die daag dök zeen.

Genóg gewazeld veur noe. Veur ’t zoeëwied is, zal ich laote weite of alles geregeld is en of ich d’r same mit miene adjudant gans klaor veur bön. 

De nieje Drakeprins

DeIl dit berich